بشبه عليك -Bashabeh 3aleek/Fo2sh
بشبه عليك
ملامحك من ملامحى
ولونك لونه قمحى
وعيونك فرحانين
بشبه عليك
قولى وفكرنى انت
انا شوفتك بس امتى
من يوم ولا سنين
يمكن زمايل مدرسة أو دفعتى فى الجيش
خبطت كتافنا يوم فى بعض واحنا فى طابور العيش
ولا أكلنا فى يوم سوى أكلة سمك فى أبوقير
جايز صليت جمبك فى يوم الجمعة فى الحسين
ولا فى يوم شيلنا العلم فى الاستاد من سنين
ولا لمحتك يوم هنا تصرخ تقول تغيير
بشبه عليك
ملامحك من ملامحى
ولونك لونه قمحى
وعيونك فرحانين
بشبه عليك
قولى وفكرنى انت
انا شوفتك بس امتى
من يوم ولا سنين
يمكن فى ليلة وقفتلى وانا عطلان ع الطريق
سألت عنى فى يوم وانا مخنوق حاسس بضيق
سايبنى ليه محتار كدا متقولى تطلع مين
هو انت أحمد ولا جرجس ولا صوت ملايين
ولا انت واحد صدره ضاق من الظلم والظالمين
ولا انت بعتك ربنا تاخد بايد ملايين
بشبه عليك
ياللى ضحيت بروحك يا واحد مننا
وسايب أهلك وناسك علشانا كلنا
يا شهيد انت مكانك فى الجنة مش هنا
كان نفسى بس أقولك انت مروحتش هدر
دلوقتى صوتنا عالى وخلاص خوفنا انكسر
بقى فيه فى قلوبنا رحمة وليلنا فيه قمر
بشبه عليكــــ