سلسلة حكايات مخبوطة مع الخطوبة .. وحكاية 1000 خيبة و خيبةةة....

الخيبة الاولى....العريس الذكي













































و قفلت مخبوطة سماعة التليفون
في وش هذا العريس المجنون ...
للأسف ما بقتش تنفع الشهادة ... اللي مش محسنة لصاحبها عادة
هو فاكر نفسه جاي يخطب بنت ناس
ولا يشتري سجادة !

وحطت مخبوطة ايدها على خدها .. بتفكر في الاشكال اللي بتتقدملها
داعية ربها يريحها من هذه النوعية
اللي كانت السبب .. في خيبتنا العربية القوية


ــــــــــــــــ



انتظروني و خيبة جديدة من خيبات مخبوطة..

الخطوبة 2


جائني يا قراء يا كرام .. انه وفي احدى الايام ..
البت مخبوطة ومن بختها المعجباني ...
اتنيلت على عينها
واتخطبت تاني
لعريس طويل القامة ... مفلطح الهامة
شديد الشبه لباراك أوباما


- شوفي يا بنتي ..
- ايوة يا بابا
- الشاب كويس .. تاجر ناجح ومقتدر مادياً .. سألت صحابه عنه قالولي عنه كلام طيب وكويس ... وعنده 30 سنة يعني اكبر منك بخمس سنين .. سبحان الله اهه ربنا بعته بعد فسخ خطوبتك على طول شفتي ربنا كريم ازاي
- ودرس ايه ؟
- هو لسة مسجل في الجامعة انتساب وبيدرس لغة عربية ..
- ايه يا بابا يعني مفيش معاه شهادة جامعة على الأقل ... ده انا بحضر ماجستير وكنت مخطوبة لدكتور !
- بقولك ايه الراجل محترم وده اهم حاجة .. ومقتدر مادياً مش هيحوجك لحد .. وشهادة الجامعة اهو بيدرس يعني عنده طموح وهياخدها في الآخر .. سيبك من كلام الناس ......... هااااه قلتي ايه ؟؟؟
- .....
- اقوله ييجي بكرة ؟؟
- اللي تشوفه يا بابا



هييييييييه هتجوز

- انتي هتخرجي للعريس كده ؟
- ايوة يا ماما
- طيب براحتك .. يلا ادخلي ..
( دخلت الصالون بدون تردد .. منا على وشك الحصول على الزمالة العربية في عرسان الصالونات .. )

وانا داخلة : السلام عليكم ...
العريس وقف : وعليكم السلام ورحمة الله ... بسم الله ماشاء الله

وعمالة اقرب .. هو ده ! ... يااااااااااه كل ده طول .. هيخبط في السقف ! .. ومال نص شعره ابيض كده ! ..
طب راعي شعوري واصبغ شعرك !!
مش كفاية مفيش شهادة

اعقلي يا بت يا مخبوطة .. الراجل مش بطوله ولا شعره .. الراجل بأخلاقه .. بلسانه .. بكرمه ..
هو صحيح ممكن يكون مقلب ومافيهوش ولا وحدة من الصفات الكريمة دي .. لكن برضو بلاش تظلميه
ويقعدوا يقولوا البنات هما اللي جابوا لنفسيهم الكافية
بيعنسواعشان بيدققوا في شهادات العريس ..
وايه يعني لو كان عصامي وبنى نفسه وبعد ما استقر ماديا اتعلم وخد شهادة ؟ ...

ويا ستي ما تزعليش ..
كل ما هنالك ان الحكاية اتعكست
بدل ما يتخرج من الجامعة ويسجل اسمه بعدها في احصائيات البطالة
ويبقى شبه مقيم في كل قهاوي البلد وحريف كوتشينة وطاولة ..

لا .. كده انتي قديمة يا مخبوطة
قصدك هيبقى مقيم في كل كافيهات النت اللي في البلد وحريف فيس بوك وهكر وقاعد طول النهار عمال يحضر ابحاث ودراسات عن كيفية سرقة ايميلات وصور البنات ..
وبعدين يلاقي وظيفة نص كم يحوش منها كل شهر نص جنيه
وبعد ربع قرن يروح متجوز ...
لا
العريس ده بقى ريحك ... اشتغل وكون نفسه الاول ...ولغى مرحلة التعارف على الفيس بوك وسرقة الايملات من حياته
لأنه هيدرس وهو مشغول في البزنس بتاعه
ومش هيلحق يتعلم الهكر
وجهة نظر برضو


وبعد ما بصيت على العريس بصعوبة بسبب النور الذي تعكسه الخصلات الشايبة في شعره ... اللي خلت عينيا تزغلل
حاولت اقنع نفسي باستماتة
ان سواد شعر العريس لا يعني بالضرورة اني هكون زوجة سعيدة
العريس حس ان عينيا بتغمض وبتفتح لوحدها
فالتفتلي وهو مبتسم ..


العريس : ازيك يا انسة مخبوطة ؟
انا بدون اي كسوف او احراج : الحمدلله
العريس : ايه مالك زعلانة ليه ؟
( وبعدين بقى ؟؟؟ )
بابا : اصلها كانت تعبانة النهاردة شوية ... ها ها ها
( ............ لا تعليق !!!! )
العريس : قوليلي يا آنسة مخبوطة .. انتي بتعملي ايه دلوقتي ؟
- في الدبلومة
- يعني خلصتي جامعة مش كده ؟
- .... هه .. ايوة خلصت .. ماهي الدبلومة للماجستير
- هاهاها .. اصلي بصراحة معرفش في الحاجات دي ماليش فيها
انا : .....
بابا : ... أأأأأ ... اخبار شغلك ايه كلمنا عنه شوية ؟
- والله يا عمي انا خلصت تشطيب في مكتب العربيات بتاعي .. وحالياً دخلت من الجمرك 10 عربيات .. كلفوني كتير ..
وابتسم وبصلي : وان شاء الله وحدة منهم هدية للآنسة مخبوطة

( متشكرين يا خويا )
بابا : يا ابني احنا يهمنا الراجل مش العربيات ..
العريس : ده أقل حاجة ممكن اقدمها للآنسة مخبوطة يا عمي .. صحيح يا آنسة مخبوطة نوع موبايلك ايه ؟
انا : نوكيا 7250
العريس : لا لا لا .. ان شاء الله هجيبلك واحد محدش مسكه قبلك .. جبت لأختي واحد بألف دولار ..
(قصدك ايه ياد ؟؟ مش عاجبك الموبايل بتاعي ؟؟؟! )
العريس : عارفة يا آنسة مخبوطة اختي دي فرحها كلفني 30 ألف دولار ... عقبالنا ان شاء الله
بابا : يا ابني مش مهم كل الكلام ده المهم الاحترام والمعاملة بما يرضي الله
العريس : طبعا طبعا يا عمي ربنا ما يجيب حاجة وحشة
بابا : قومي يا مخبوطة قولي لماما تعملنا قهوة ( وغمزلي )


وجريت على اوضتي .... وهاتك يا عياط

ماما : ايه مالك ؟
انا : يا ماما ده ما بيفهمش حاجة غير في الفلوس !!
- ..... وبعدين هنفضل كده ؟
- معرفش انا مش قابلاه وشكلنا كده مش نافعين لبعض


بعد شوية جه بابا : الراجل روح .. ايه رأيك فيه ؟
انا : يا بابا ده طول القعدة يتمنظر عليه بفلوسه ...
- انتي عايزة تعنسي ؟ لو عايزة تعنسي قولي ؟
- لا مش عايزة اعنس .. بس برضو مش عايزة اتجوز ده ..
- الراجل كويس وقلنالك هيكمل تعليمه .. هو صحيح طويل اوي .. بس الطول للراجل زينة !
( الطول زينة اه بس مش للدرجة دي 220 سم !! ... اكلمه ازاي ؟.. مفيش حل بقى الا اني كل ما هعوزه اتصل بيه .. ولا اديله رنة عشان ينخ على ركبه )


بابا : يا بنتي ... الراجل المقتدر هيريحك في حياتك .. والتعليم مسيره ياخده انتي زعلانة ليه ؟ ولو انتي شاطره شجعيه على المزاكرة
انا كان نفسي تتخطبي قوام بعد ما خطوبتك اتفسخت ... وربنا حققلنا امنيتنا
انا : ...... طيب زي ما انتوا عايزين


وقرينا الفاتحة ..
مش لولولولولولولولولولوي



وبعد قراية الفاتحة من غير نفس
مخبوطة بدأت تتعامل مع الموقف كأنه ما حصلش اصلا
اصل لو رفضت هيقعدوا يجروا ورايا من اوضة لاوضة
عشان يقنعوني اوافق عليه بكلام يفتح النفس
زي ...
لو رفضتيه هتعنسي .. والفرصة تأتي مرة واحدة
عمرك ما هيجيييييلك احسن منه ... ويفسروا في وشي
ومهما قلت انه مش مناسب ليا شخصيا
مفيش فايدة ...
اوافق عشان اثبتلهم بالتجربة العملية انه ما ينفعش ..
في ناس كده لازم يتلسعوا من النار عشان يقتنعوا انها بتحرق
فقررت مخبوطة تجاري الوضع ...
ومع الوقت
وشوية شوية ..
تحقق اللي هي عايزاه
بدون ما تتعرض للضر .. أأ .. قصدي يعني لخلافات اسرية


ماما : مخبوطة .. يا مخبوووطة ... خطيبك قاعد في الصالون البسي وروحي اقعدي معاه شوية
انا : ... طيب

لبست ورحتله في الصالون : السلام عليكم .. ازيك ؟
خطيبي : اهلا اهلا ... ازيك يا مخبوطة ايه بتعملي ايه ؟
- عندي بحث وكنت بزاكر .. منتا عارف الامتحانات قربت
كشر وقالي : آه .. يا ستي .. ربنا يوفقك ..
- وانت اخبار مزاكرتك ايه ؟
- مزاكرة ايه ؟ ... آه آه .. يا شيخة بلا مزاكرة بلا بتاع يعني هعمل بالشهادة ايه منا الحمدلله مش محتاجها
( انا كنت حاسة من الاول !! )

- هو يعني ما بيتعلمش الا الفقرا عشان يشتغلوا بشهاداتهم ؟!
- التعليم ده للناس الخايبة ... المتعلمين بيتمنوا اشغلهم عندي !
( دي عقد نفسية بقى !! )
- يا سلام ! .. انت مش ناوي تكمل ولا ايه ؟
- ومين قالك اني ابتديت اصلا .. انا سجلت كدة بس عايز الشهادة ديكور .. انا ما بحبش القراية بتخنق منها .. المهم .. شوفي جبتلك ايه .. ايه رأيك ؟
- حلوة تسلم ايديك
- عارفة قزازة الريحة دي تمنها 100 دولار ..
- ... ميرسي
- وشوية الماكياج دول كلفوني يجي 150 دولار .. طبعا الغالي للغالي
( انت كل حاجة تجيبها هتقولي تمنها ! .. بتعايرني ولا ايه )
- ... قلنا ميرسي

وفضلت مخبوطة بعد كده تحاول تطفش خطيبها ده ..
مرة بتكشيرة
مرة بتطنيش .. مراااات بردود باردة ..
او تبصله بقرف
لكن ....... مفيش فايدة
لاااااازق لااااااازق



انا : بقولك ايه انت لازم تخلصني من الراجل ده بأي شكل
اخويا : طب اعمل ايه ! ..
انا : مش عارفة انا نفسيتي تعبانة وامتحاناتي قربت ومش عارفة ازاكر ..
اخويا : بصي ما تفكريش في اي حاجة غير مزاكرتك .. واوعدك مش هتكملي مع الراجل ده .. بس لازم تعرفي يا مخبوطة ان مفيش حد كامل ...
- عارفة .. بس مش ده ... مش ده ... مش ده


وراح اخو مخبوطة لخطيبها

- شوف عايزك في كلام رجالة .. بصراحة البنت وافقت عشان ما تزعلش بابا .. وهي مش عايزة تتجوز ... هاه قلت ايه ؟
- لا مش ممكن
- معلش حاول تفركش انت من عندك عشان هي مش عارفة تفركش ..
- طب مش هفركش
- ذنبك على جمبك بقى ...



و فضل اخو مخبوطة وجوز اختها يقنعوا في ابوها ان الراجل ده مش هيكمل تعليمه وانه ما ينفعش
واستنتجوا ان مخبوطة لو اتجوزته هتعمله عاهة مستديمة باستخدام احد ادوات المطبخ
وتاخد فيه 6 شهور وتبقى سوابق ..
اوتقتله وتترحل على عشماوي وتكون هربت من لقب عانس لتفوز بلقب المرحومة
وفي احسن الظروف هتطلق وترجعلهم بعيل
ونقول يا ريت اللي جرا ما كان ... نفركش من دلوقتي احسن


بابا - شوفي يا مخبوطة ... الراجل ده شكله كده مش ناوي يكمل تعليمه .. وانتي شكلك كده مش هتعمري معاه ........
لو مش عايزاه قولي من دلوقتي نفركش .. بصراحة انا واخوكي وجوز اختك كمان بعد ما اتعاملنا معاه ما ارتحنالوش .. نفكرش ؟
- فركش يا بابا فركش .. هيييييييييييييييه
( مش قلتلكوا .. مفيش احسن من الحلول السلمية .. ونجاري الوضع مؤقتا منعا لاراقة الدماء ... وخطوبة تفوت ولا حد يموت ... نياهاهاها )





وتخلصت مخبوطة من خطيبها المعقد ..
اللي كان عامل فيها مهند

بعد ما رجعتله كل هداياه الثمينة .. ومش عايزة منه برفان ولا زينة ..
وزاكرت مخبوط وجابت تقدير .. وجهزت نفسها لبحث الماجستير

داعية ربها يريحها من هذه النوعية
اللي كانت السبب ..
في الخيبة العربية القوية


انتظرونا و خيبة جديدة من حكايات مخبوطة و 1000 خيبة و خيبة

قبل كتب الكتاب


جائني يا قراء يا كرام .. أنه .. وفي احدى الأيام
البت مخبوطة .....

اتخطبت تالت ... و ..

اصل ... اصل ... خطيبها ..
المرة دي ....

أأأ ... أأأ ...

أأأأأأأأأأأأأأأأأأأأع






- شوفي يا بنتي ..
- ايوة يا بابا
- المرة دي دكتور وبيحضر ماجستير في الجراحة , هو صحيح لسة طالب وما بيشتغلش وظروفه مش مساعداه اوي , انما جاد في طلبه واحنا اللي يهمنا يا بنتي الأخلاق واهو مستواه التعليمي ممتاز مش ده اللي انتي عايزاه ؟
وسنه من سنك بالزبط 27 سنة , انا سألت عنه وكل الناس شكرت فيه وقالولي جوزه بنتك وانت مغمض .. ها قلتي ايه ؟
- .....
- اقوله ييجي بكرة ؟؟
- اللي تشوفه يا بابا



هييييييييه هتجوز

- بقولك ايه المرة دي هتلبسي بنطلون قدام العريس فاهمة , وتحطي مكياج كويس على وشك
- اشمعنى يعني ...
- عشان تباني اصغر منه
( آااااه دخلنا في المرحلة الذهبية من حياة كل بنت .. وهي التعقيد من السن ! ... لازم نعمل احتفال بالمناسبة دي !! )
- بنطلون اوكي انما مكياج كتير لا !

ودخلت الصالون ... بخطى الخبير الواثق في مجال الخطوبات الصالونية


وانا داخلة : السلام عليكم ...
العريس وقف : وعليكم السلام ورحمة الله ... بسم الله ماشاء الله


وعمالة اقرب .. هو ده ! ..
معصعص ! .. وايه المساحات الصحراوية دي !!
ده اقرع يا بت !!

بس للأمانة يعني .. هي المساحات الصحراوية دي مش شاملة كافة مناطق الرأس .. يوجد بعض اعشاب السافانا على الأطراف
عشان ما نظلمش الجدع

يلا المهم يكون تحت القرعة دي مخ بيفهم ..
يارب يكون بيفهم
يارب يكون بيفهم


العريس : ازيك يا انسة مخبوطة ؟
انا بصوت زهقااااان : الحمدلله
العريس : ايه مالك زعلانة ليه ؟

( لا تعليق )

بابا : اصلها كانت تعبانة النهاردة شوية ... ها ها ها

( وبعدين بقى ؟! )

بعد شوية العريس حط ايده على خده وبصلي وسرح .. وفضل سرحان .. سرحان .. سرحان .. هو عايز يرسمني ولا ايه ؟
بابا للعريس : اخبار مزاكرتك ايه ؟
فاق العريس من سرحانه العميق : آه .. الحمدلله ياعمي كله تمام .. ازيك يا آنسة مخبوطة ؟
انا : الحمدلله
- كويسة ؟
( ما قلنا الحمدلله )
- اه الحمدلله ... انت كنت عايش في السعودية من زمان ؟
- ايوة طول عمري هناك ... رحتيها قبل كده ؟
- زمان وانا صغيرة
- وان شاء الله هتروحيها معايا كتير
( طيب يا خويا اما نشوف ! )
بابا للعريس : وناوي تسكن فين ان شاء الله بعد ما تسيب سكن الطلاب ؟
العريس : مش لما نعرف رأي الآنسة مخبوطة في الموضوع الأول يا عمي ؟
بابا : مخبوطة بنت عاقلة ورأيها من رأي ابوها

التفتلي بابا وبصلي بصة تهديد معناها اياكي تعترضي .. اعترض على ايه هو انا فضل فيا حيل اعترض
المجتمع هد قوايا الاعتراضية .. احم احم .. مؤقتا يعني


بابا : ولا ايه يا مخبوطة ؟
انا بصوت لا يكاد يسمع وعنيا في الأرض : .. إممم
( العريس رجع للسرحان تاني .. وعمال يتأمل كأني مخلوق فضائي عجيب اول مرة يشوفه .. انت عبيط ياد ؟! )
العريس بعد ما فاق من سرحانه : بصراحة يا آنسة مخبوطة اعتقد السيد الوالد قالك عن ظروفي ..
انا : .. إممم
العريس : الحقيقة في البداية مش هقدر اجيب شقة في المنطقة اللي انتوا عايشين فيها دي .. في عندك مشكلة في الموضوع ده ؟
بابا : لا ماعندهاش مانع طبعا .. احنا يهمنا الأخلاق والمعاملة الحسنة .. ولا ايه يا مخبوطة ؟
انا بصوت انهكه الزهق : إممم .. طبعا
العريس : طب الحمدلله رب العالمين ..
بابا : قومي يا مخبوطة قولي لماما تعملنا قهوة .. ( وغمزلي )

قمت ومشيت على اوضتي بجرجر نفسي زي السلحفاة المعمرة ...
ماما واختي : هاه ايه الأخبار ؟
انا : إممم .. كويس
اختي : عجبك ؟
انا : عادي .. مش مهم .. اي حاجة
- لو كان راجل كويس يا مخبوطة صدقيني
هتفرحي فرحة كبيرة ..
- إممم .. ان شاء الله

بعد شوية جه بابا : الراجل روح .. ايه رأيك فيه ؟ أظن كويس مفيش عليه اعتراض ...
انا باستسلام : لا يا بابا مفيش اعتراض ..

وقرينا الفاتحة ..
وكتب الكتاب بعد عشر ايام
لولولولولولولولولولوي

ماما : مخبووووطة ..
انا : ايوة يا ماما
- كلمي باباكي على التليفون ...
- آلو .. ايوة يا بابا
- هو فستان الخطوبة يتكلف أد ايه ؟
- مش عارفة الأسعار متفاوتة حسب الفستان .. ليه ؟
- عشان ابعتلك الفلوس مع السواق تنزلي انتي واختك تنقوا واحد خلاص الحفلة قربت مفيش وقت ..
- طيب يا بابا مش المفروض هو اللي يجيبلي الفستان !
- ظروفه ما تسمحش دلوقتي .. مش عايزين نتقل عليه
( نتقل عليه ؟! ... بابا ده مسكين .. فاكر ان عرسان الأيام دي بيطمر فيهم ! .. مش عارف ان الدراسات أثبتت ان عرسان ما بعد سنة 2000 سجلوا اعلى مستوى ندالة عرسانية على مر التاريخ !)
- حاضر يا بابا

اتخنقت مخبوطة وراحت اوضتها تعيط
ماما : مالك ؟
- باين عليه من اولها بخيل
- ليه ؟
- قال مش قادر يجيبلي فستان ! .. مش عيب عليه يخلي بابا يجيبهولي ... مش قادر يستلف تمنه يعني ! ... انا مش مرتحاله
ماما : وبعدين في حظنا ده .. ربنا يفرجها .. معلش استحملي اللي عايزة تتجوز لازم تتنازل شوية وتعديها !!


وبعد ايام خرجت مخبوطة مع عريسها ووالدتها واخوها عشان ينقوا الشبكة ..
خطيبي : تحبي نروح محل معين نجيب منه الدبل يا مخبوطة
- لا .. انت تعرف محل ؟
- انا بسألك انتي .. عايزة مكان معين نروحه ؟
- في المول في محل دهب حلو .. ممكن نروح عليه
- لا انا اعرف محل واحد صاحبي وهيراعينا في الأسعار
( اومال بتسألني من الأول ليه ؟ .. هو ايه يختي ده ؟! )

نقت مخبوطة الدبلة .. العريس اتدايق قال غالية اوي .. وفضل ساعة واقف يفاصل في صاحب المحل على سعرها .. بعد شوية طلع رزمة فلوس من جيبه آااد كده ودفع تمن الدبلة ورجع الباقي في جيبه.. ويلا نروح ...

ايه خلاص كده ! ... مفيش خاتم ولا حاجة !
بصت مخبوطة لمامتها وهي مكسوفة مش قادرة تتكلم ...
ماما شاورتلي براسها ان معلش عديها ...

ايوة يا مخبوطة عديها .. ما انتي عارفة انه مخنوق وظروفه صعبة ..
مش يمكن الرزمة الكبيرة اللي معاه دي شايلها لتكاليف تانية !
ما تبوظيش الدنيا عشان شوية شبكة
ويقعدوا يقولوا ان كل البنات بتعنس عشان بيدققوا في الشبكة

ويرسلولنا نداءات استغاثة ..
يا بنات ..
خففوا الطلبات عن العريس
وخذوهم فقراء .. هو انتوا بتعنسوا من شوية ! ..
ده انتقام ربنا منكوا ... من اللي بتعملوه في الشباب المسكين




طيييييييب .. مااااشي ...
ادينا ساعدنا العريس .. الشبكة اتأجلت لحين ميسرة
والفستان والكوافير والحفلة
بقم على شكل ديون .. وبالتقسيط المريح
عشان نقف جمب الشباب الغلبان ..
اللي كل مشكلته .. انه فقير ومش لاقي يتجوز
ولا يعاني من اي مشاكل اخرى كنقصان الاهلية واهتزاز النفسية وشلل رباعي في قواه العقلية


طيب يا مجتمع يا ندل
ادينا بناخد بالاسباب .. عشان محدش يقول انتوا عايزين عريس كامل الدسم
اهو عريس منزوع الدسم .. ومنزوع شعر الرأس كمان




يوم الحفلة .. لولولولولولولولولي

دخلت مخبوطة المطبخ ,, وتفاجئت من هول ما رأت ..

- ايه كل الحلويات دي ؟ خطيبي جاب كل ده ؟
اخويا : لا ده بابا اللي جابها
- كمان ! .. هو عريسي ده مش هيتكسف على دمه ويجيب حاجة !
- ماهو هيرجع كل حاجة بعدين لما اهله يبعتوله الفلوس
( طيب ... ماشي ... اما نشوف )




جهزت البت مخبوطة ووصل العريس وسط الزغاريت .. لولولولولولي

انما ايه الشياكة دي يا واد ..!

انا للعريس : منين البدلة دي ؟
- من المول .. ايه رأيك ؟
( يا نهار اسووود !! ...جايب لنفسك بدلة واستخسرت تجيبلي فستان !!!!! .......... يووووه وبعدين معاكي يا مخبوطة !!! ما تظلميهوش مش يمكن فهمتيه غلط ... كل الناس قالوا انه واد محترم جدا اتجوزيه وانتي مغمضة .. هيكونوا كووووول الناس غلط وانتي اللي صح يعني !! مش يمكن البدلة الانيقة دي استلفها من المكوجي ومكسوف يقول !! )








وقعدت مخبوطة العروسة .. جمب عريسها وهي مفروسة
بتبص للمعازيم بعنيها .. اللي لاحظت انهم حاقدين عليها
وان كل واحدة فيهم بتتمنى ..
تخطف عريس مخبوطة ... من بين ايديها

مش عارفين
ان مش كل عريس بيبقى راجل ..
ولا كل مخطوبة
من السعادة بتتمايل



ولازالت الخيبات تتوالى على مخبوطة

تابعوهااااا

و,,, بعد كتب الكتاب,,,



جائني يا قراء يا كرام .. انه وبعد كتب الكتاب
خطيب مخبوطة اتصل بيها
عشان يفسحها ويغديها
وفي نفس الوقت .. يقرفها وينكد عليها




خطيبي : تحبي نخرج نروح فين ؟
انا : اي مكان تختاره
- لا انا عايزك انتي تختاري
- إمممم ... مش عارفة بجد مفيش مكان محدد في دماغي .. انت بتفكر في مكان معين ؟
- مخبوطة سيبك مني ... انا عايز اعرف رأيك انتي نروح فين ؟
- ... طيب نروح المول وبعدها نروح السينما ؟
- المول ؟ اشمعنى يعني ؟
- يعني .. اصله مسلي
- لا ليه المول يعني انتي كنتي تروحيه مع مين ؟
- مع اخواتي او صاحباتي ! .. ليه في حاجة ؟
- لا مفيش , من رأيي بلاش المول انا اعرف مطعم سمك كويس نروح عليه نتغدا هناك وخلاص .
( يا سلام ! قاعد تزن عليا اختار مكان وفي الآخر تقولي لا نروح مكان تاني ... انت كل مرة تعمل فيا كده ياد انت !)

في المطعم :
خطيبي : انا هطلب فيليه سمك .. وانتي ؟
- اوكي وانا كمان
خطيبي للجرسون : اتنين فيليه سمك مع الرز والسلطات .. عندكو شوربة ؟
الجرسون : ايوة يا افندم في شوربة خضار , في عدس في ...
خطيبي : اه عدس كويس .. تحبي تاخدي عدس يا مخبوطة ؟
انا : لا ميرسي
خطيبي للجرسون : طب اتنين عدس ليا وللآنسة ....
( هو ايه ده ! )

- ليه مش عايزة عدس انتي ما بتحبيهوش ؟
- لا ما بحبوش
- بس انا بحبه .. يبقى انتي لازم تحبيه .. ولا ايه ؟
- لازم ازاي يعني ؟
- طبعا.. لأن كل حاجة بينا لازم تكون مشتركة
- ايوة بس مش لدرجة الأكل .. الأكل ده حسب النفس ..
- وبعدين معاكي انتي هتزعليني منك ومش هتشربي من الشوربة ولا ايه ؟ .. طب لو طلبت منك تغصبي على نفسك وتشربيها هتشربيها عشاني ؟
( ماله ده ؟ .. طب اقوله لا واعملها مشكلة ؟ .. ولا اكبر دماغي في اليوم ده ! )
بابتسامة مصطنعة : لا هشربها عشانك

فرح خطيب مخبوطة العبيط بكلامها ده ... ولما جه الأكل :

خطيبي : هتخلصي طبق العدس كله ماشي ؟
انا : شوف انا هشرب منها عشان خاطرك انما اخلص الطبق الكبير ده صعبة شوية ...
- طب تحبي تحطي عليها بصل ؟
- فين في الشوربة ؟ .. لا
قام ماسك حتة بصلة من المتقطعة في طبق السلطة وحطها في طبق الشوربة بتاعي وقال :
- انا بحبها كده فيها بصل .......!
( ايه يا بني ده انت عكس عكاس ؟! .. بصيتله وانا مبرقة عينيا مش مصدقة حركات العيال اللي بيعملها دي )
- ما تبصيليش كده ... يلا بالهنا والشفا ...

كتمت مخبوطة غيظها .. وكبرت دماغها عشان ما تتخانقش في المطعم وسجلت في الميموري اللي في دماغها ملاحظاتها على شخصية زوج المستقبل
حيث سيتم دراسة هذه الملاحظات في وقت لاحق

خطيبي : مخبوطة ... نفسي اسألك ... ايه نظرتك ليا ... يعني شايفاني فتى الأحلام اللي كنتي بتحلمي بيه ؟
- فتى الأحلام من ناحية ايه ؟
- شكلي مثلا وشخصيتي
( شكلك ايه يا عم هو في وحدة فتى احلامها مسلوع واقرع كده ! ايه ما عندكوش مرايات في بيتكوا ؟! )
عشان اهرب من الاجابة قمت سألته :
- طب انت دلوقتي شايفني فتاة احلامك ؟
( توقعت يقولي لا )
- ايوة انتي فتاة احلامي .. وانا ... فتى احلامك ؟
( ورطت نفسي اكتر ! )
- .... آه
- ومالك بتقوليها كده ...
-عشان باكل .. ولا انت مش عايزني اشرب العدس ؟
- لا اشربي بالهنا والشفا ..

بعد ما رجعنا البيت :
ماما : اهلا اهلا يا دكتور .. انا عملتلك قطايف مخصوص عشانك
- تسلمي يا حماتي

بعد ما ماما مشيت :

خطيبي : على فكرة انا ما بحبش القطايف ومش باكلها الا لو كانت مزبوطة اوي
- ماما بتعملها مزبوطة اوي اوي
ابتسم ابتسامة سخرية : هه هه .. انتوا فرحانين على شوية القطايف دي ؟ .. اومال لو شفتي اللي بتعملها امي كنتي هتقولي ايه .. دي ولا حاجة جمبها !


وسجلت مخبوطة للمرة التانية في الميموري ملاحظات مهببة على شخصية زوج المستقبل

وفي يوم ..


صاحبتي : ايه يا عم مابقيتيش تسألي علينا غرقانة في العسل مع خطيبك !!
انا : عسل ايه يا شيخة .. ده انا مخنوقة اوي
- معلش يا مخبوطة بكرة هتحبيه
- مش حكاية حب .. طباعه خنيئة اوي
- بكرة تتعودي عليه ...
- ما اعتقدش ان ممكن حد يتعود على القرف ده .. تصوري من يوم كتب الكتاب ماجابليش هدية .. ولا دخل وفي ايده كيس موز ! .. وكل يوم والتاني جاي من الصبح غدا وعشا وسهر للفجر .. حتى اهلي لاحظت انهم متدايقين منه ... مفيش عنده ذوق خالص !
- معقولة ! .. ده باين عليه بخيل ودمه تقيل !
- واضح انه كده



وفي يوم ..... الساعة 1 بالليل :
- مالك يا مخبوطة انتي نعسانة ؟
( ياعم ما تقوم بقى حابسني جمبك من الصبح فلقتني !! )
- .. بصراحة .... آه
- انا مش عارف ازاي يجيلك نوم وانتي قاعدة مع خطيبك
- طب ما انتا اهو نعسان وعنيك حمرا ..
- ايوة بس مش ممكن اقوم واسيبك !
( يعني ايه ؟... مش هتقوم ؟! .. مش هنام !!! )
- لا انت باين عليك تعبان وعايز تنام .. لازم تقوم ..

ومن الساعة 1 لحد الساعة 3 لحد ما اقتنع انه لازم يرحم
نفسه وينام
لحد ما خرج كانت الساعة 4 .. !!!




تاني يوم الصبح الساعة 8 :
ماما : مخبوطة .. مخبوطة .. اصحي
- ... في ايه ؟
- خطيبك جه وقاعد في الصالون
- ايه ! ... هو لحق يروح ويرجع .. ايه اللي جابه ! ..... قوليله نايمة
- قلتله قالي صحيها !!
- يوووووووه انا مش قادرة اقوم .. يومين مش بنام كويس منه !
- معلش اغسلي وشك وفوقي .. انا عارفة ماله كده ربنا يهديه

وقامت مخبوطة وقفت قدام الحيطة ونفسها تخبط دماغها فيها .... وراحت لخطيبها في الصالون :

انا : صباح الخير .. ( مع نظرة ايه اللي جابك دلوقتي !! )
خطيبي : يلا البسي وتعالي معايا ..
- دلوقتي ؟ فين ؟
- انا عازمك عالغدا ...
- غدا الساعة 8 الصبح !
- لا ماهو هقضي كم مشوار كده هيكون جه معاد الغدا ...
انا بكل رجاء : بصراحة انا نعسانة اوي .. ومش قادرة اخرج دلوقتي .. انت روح اقضي مشاويرك ولما تخلص تعالى خدني ونخرج نتغدا ..
- يا سلام يختي ! ... يلا بلاش كسل .. ولا عايزاني اروح لآخر الدنيا اقضي مشاويري وبعدين اخبط مشوار تاني ارجعلك اخدك وبعدين نرجع المطعم نروح نتغدا وبعدين ارجع اوصلك ! .... ما تيجي معايا ونروح على المطعم على طول من هناك هنوفر 3 مشاوير مالهمش لازمة
- هو احنا لازم نروح المطعم البعيد ده ... لما تيجي نروح اي حتة تانية قريبة ...
- لا المطعم ده المدير بتاعه صاحبي وبيراعيني ...

آآآه هي مسألة فلوس ؟! ..
وانا بقول كل مرة واخدني على نفس المطعم ليه !
ده انت بخيل بشكل !!

وسجلت مخبوطة ملاحظات مهمة عن شخصية زوج المستقبل في الميموري اللي بدأت تطلق انذارات مدوية واضواء حمراء ..
بيانات الميموري :
الملاحظة المسجلة : بخيل جلدة
مستوى الخطر : عالي جدا
الاضرار المحتملة : هموت من الجوع معاه

ممم .. حاجة تخوف يا بت يا مخبوطة صراحة !!


واتباعا لسياسة الصبر وتفضيل الحلول السلمية
سكتت مخبوطة وهي تضمر لخطيبها الشر والانتقام يوماً ما مما يفعله بها .. وراحت تلبس هدومها في صمت لحد ما تشوف اخرتها معاه .

خرجت مخبوطة مع خطيبها اللي دوخها السبع دوخات ..
وأثناء ماهم قاعدين في صالة انتظار عمال يتكلم مع مخبوطة في كلام يفلق الصخر لحد ما يخلص اجراءاته اللي جاي عشانها ..
دخل واحد وقال : السلام عليكم ..
رد عليه خطيبي : وعليكم السلام ..
وردت مخبوطة في نفس الوقت تلقائياً بصوت واطي لا يكاد يسمع : وعليكم السلام
الراجل سأل عن شخص معين خطيبها قاله انه مايعرفوش .. بعد ما الراجل خرج ..
خطيبي : انتي ازاي تردي على الراجل السلام ؟
- فيها ايه يعني ؟
- هو انتي راجل عشان تردي على الرجالة السلام وانا قاعد !
- انا رديت بشكل عفوي ! وصوتي كان واطي حتى هو ما سمعنيش
- بصي .. لازم تفهمي حاجة .. من هنا ورايح ما تتكلميش مع اي مخلوق الا معايا ومع اهلك وصاحباتك البنات
- يا سلام ! .. افرض اتحطيت في موقف اضطريت فيه اتكلم او ارد على حد !!
- ما ترديش تحت اي ظرف ..
- اعيش خرسة يعني .. هو ربنا قال كده !
- انتي بتناقشيني كتير ليه ! ... انتي بنت يعني تقولي نعم وخلاص .
- ايه ! .. هم البنات ممنوع يتكلموا وممنوع يكون ليهم رأي ! انت جايب افكارك دي منين !
- انا اتربيت على كده وهو ده الصح
- بس انا مش بنت صغيرة ! .. والحياة ما تمشيش بالطريقة بتاعتك دي !
- حياتك اللي فاتت ترميها ورا ضهرك .. من ساعة ما البنت تتخطب لازم تعيش زي ما خطيبها عايز .. وبعد الجواز تنفذ طلباته من غير نقاش ..



ولما جت البت مخبوطة المرة دي تسجل ملاحظاتها في الميموري اللي في دماغها ..
ظهرتلها رسالة تحذيرية :
لقد خزنتي يا بت يا مخبوطة ملاحظات سوداء عن شخصية زوج المستقبل زيادة عن اللزوم
هنفجر من الملاحظات المنيلة بنيلة اللي بتسجليها ..
افسخي الخطوبة دي وارحميني بقى


بعد ما رجعنا البيت :
خطيبي : غيري هدومك بسرعة مش تقعدي ساعة تغيري وتصلي وتسيبيني ملطوع في الصالون !
( ايه هو انت ناوي تكمل اليوم معايا هنا !! .. يعني مش هنام !! .. مش هرتاح من خلقتك شوية !! )

وفضل خطيب مخبوطة لازق عندها
شوية يتناقروا .. وشوية تزعل ويصالحها .. وشوية يتناقشوا وتقلب بخناقة تانية ...
لحد ما جه الليل ...
وجابتله مخبوطة العشا وحاسة ان دماغها هتتفلق نصين :

خطيبي : ايه ده ؟ بيض وجبنة وفول ؟
انا بعد نفاذ الصبر : ماله البيض والجبنة والفول ؟
خطيبي وهو لاوي بوزه : لا مالوش ..



تاني يوم الصبح : الموبايل عمال يرن يرن يرن .. فتحت مخبوطة عنيها لقيت 26 مكالمة فائتة .. و3 مسجات .. خير اللهم اجعله خير ! ... يووووووووه ده هو ..

- آلو .. صباح النور ..
- انتي نايمة لحد دلوقتي ؟!
- لسة الدنيا صبح
- طب مفيش مسج حلوة فيها كلمتين حلوين ... مفيش صباح الخير يا حبيبي .. اشمعنى انا برنلك وببعتلك كل عشر دقايق !!
- هو انا بسيبك الا لما انام .. عايزني وانا نايمة ابعتلك يعني !
- طب دلوقتي اتأخرتي في الرد ليه .. عمال ارنلك من الصبح
- منا كنت نايمة وتعبانة ! انا ليا اسبوع مش بنام كويس ..
- حتى لو كنتي في سابع نومة وارنلك تقومي من نومك على طول تردي
- هو انا مش بني آدمة !
- انتي بتكلميني كده ليه ! ...


وقلبت بخناقة .. كالعادة في الآخر مخبوطة قعدت تعيط وخطيبها بعد ما يهبب الدنيا يقعد يصالح فيها ....


بالليل عزمها خطيبها على فسحة عشان يصالحها ..
خرجت مخبوطة معاه وهي عاملة زي انبوبة البوتجاز اللي هتنفجر في اي لحظة ...
وقفوا في الشارع ياخدوا تاكسي .. كل ما يمر تاكسي يتشرط خطيبها عليه انه مش هيدفع اكتر من مبلغ معين ...
السواق ما يرضاش ويمشي .. واللي بعده واللي بعده ..
ليا نص ساعة واقفة في الشارع ..
ايه البخل ده !

انا : تعبت من الوقفة ادفعلهم اللي يطلبوه بقى !
هو : هففففففف .. طيب
و أثناء القعدة ..
خطيبي : على فكرة .. في دكتورة زميلتي نفسها تتعرف عليكي وانا قلتلها اننا خارجين النهاردة انا وانتي .. اتصل بيها اقولها تيجي ؟
انا : خليها مرة تانية انا النهاردة متدايقة ومش عايزة اكون مكشرة في وشها تفتكر اني بعاملها وحش
- مممم .. طيب
مسك خطيبي موبايله وطلب رقم ... :
- آلو .. ايوة يا دكتورة انا وخطيبتي مستنيينك .. ايوة في المكان الفلاني .. في انتظارك .. مع السلامة .
( بقى كدة !!! .... طيييييييب والله لوريك )

وصلت الدكتورة ورسمت مخبوطة على وشها ابتسامة عريضة وهاتك يا رغي مع الدكتورة .. وتجاهلت خطيبها تماما ..

انا : صحيح يا دكتورة تاخدي ايه ؟
الدكتورة : لا انا عازماكوا النهاردة .. انتوا تحبوا تتعشوا ايه ؟
- لا ما يصحش عيب تدفعي الحساب والدكتور موجود ! .. احنا اللي عازمينك طبعا ..
الدكتورة اتكسفت وحاولت تخلي العزومة عليها بس انا اصريت ان احنا اللي نعزمها ....
خطيب مخبوطة قاعد يبصلها وعنيه بتطق شرار عشان دبسته في عزومة العشا ..
احسن عشان تحرم مرة تانية تعمل عليه الشويتين بتوعك

طبعا رجع خطيب مخبوطة معاها عشان يكمل السهرة والخناقة في البيت :

- ازاي تحطيني قدام الأمر الواقع وتخليني اعزمها !!!!
- فيها ايه ؟ ... يرضيك الست تدفع وانت موجود ؟ طب تقول علينا ايه ؟!
- اذا كانت هي اللي عايزة تعزمنا انتي تحشري نفسك ليه ؟!!

واستمرت الخناقة اللي انتهت بعياط مخبوطة ومحاولات خطيبها انه يصالحها ...




تاني يوم الضهر :
ماما : مخبوطة .. خطيبك جه في الصالون ..
انا : طبعا جاي يتغدا ... ماهو بيتنا بقى اوتيل لسيادته
ماما : طب نعمل ايه نطرده يعني !! .. روحي اتغدي معاه لحد ما باباكي يرجع ويتصرف معاه

اثناء الغدا :
خطيبي : المحشي ده ناقص ملح ! ...
( مارديتش ولا كأني سمعت حاجة )
- انتوا مش عاملين شوربة مع المحشي ليه ؟؟
ببرود : .. عادي بقى

خطيب مخبوطة اتغاظ من برودها .. عمال يكلمها بترد عليه بالقطارة ... قام وقف وقال :
- انا ماشي
بمنتهى البرود : .. اوكي
دخلت ماما : ايه يا دكتور على فين .. مش تشرب الشاي الأول ؟

ما صدق سمع كلمة ماما وقعد
مخبوطة ولعت وكانت هتشد شعرها خرجت من الصالون عشان تعمله الشاي .. بعد شوية ندهت على مامتها :

- يا ماما فين السكر ؟
جت ماما : .. شوفيه في الـ ..
- انا ما بدورش على السكر .. انتي ليه تعزمي عليه يشرب شاي .. ماهو كان ماشي !!!!
- انا قلت اعمل معاه الواجب ..
- انا تعبت منه وعايزاه يمشي نفسي انام يا عالم بقى .. نفسي ارتاح شوية منه .. لما يكون ماشي ياريت ما تقعديهوش
- انتي بتكرهيه للدرجة دي يا مخبوطة !
- ايوة بكرهه .. بكرهه .. بكرهه !




ودودة ..


ابوها : انا هحاول اتكلم معاه .. ونصبر عليه للآخر .. بس اوعي تغلطي عليه بكلمة .. خليكي صبورة واتصرفي بحكمة , مش ناقصين يطلع يتكلم علينا بكلام مش كويس قدام الناس .. فهمتي ؟

امها : استغفري يا مخبوطة وصلي صلاة استخارة عشان ربنا يسهلك امورك ويقدرلك الخير ...

اختها : هم الرجالة في اول الارتباط بيكونوا كده غيورين ويلزقوا في الوحدة .. بعد الجواز هيتغير

اخوها : انا من رأيي ربنا يسهله .. هو احنا ناقصين قرف ! .. ما يهمكيش كلام الناس

صاحبتها : انتي تقبلي فكرة انك تكوني مطلقة ؟ ... الناس هتقول ايه ؟!


يقولوا اللي يقولوه ..
هو انا هعمل حساب للمجتمع الندل كمان !


وفي يوم ..
بصت مخبوطة في موبايلها ولقت 15
مكالمة فائنة و4 رسائل ..
يوووووووه وبعدين في القرف ده ...

انا : آلو ...
خطيبي : انتي فين كل ده ..
- كنت بساعد ماما في المطبخ ...
- ومش سامعة الموبايل ؟
- انا عاملاه سايلنت
- ليه بقى ان شاء الله ! ... عشان تخلصي مني مش كده !!!!
- لا مش كده .. بس انت بترن ليل ونهار واخواتي نايمين معايا في الأوضة ... عملته سايلنت ونسيت ارجعه تاني ..
- اه يعني اخواتك اهم من البيه خطيبك مش كده ؟؟؟؟؟؟؟؟
( اللهم طولك يا روح )
- انت ليه تفكيرك كده !
- ماله تفكيري ؟ ... انا عارف انك ما بتحبينيش .. انتي اهلك غصبوكي عشان توافقي
- محدش غصبني على حاجة .. انت اللي طباعك غريبة !
- انا طباعي غريبة !!!! ... بقيت مش عاجبك !!!! بدل ما تحمدي ربنا اني خطبتك وانتي عندك 27 سنة كان مين هيبص في وشك ويعبرك !!
- طلقني
- ايه !!!!!!!!!
- طلقني !!!!










وحصلت مخبوطة على الطلاق .. وسابت خطيبها الذي لا يطاق
بعد ما الناس انتقدوها .. وبظلم خطيبها اتهموها
مش مصدقين انه واد ساقع
اكمنه مربي دقن .. وبيصلي في الجامع

وحطت مخبوطة ايدها على خدها .. بتفكر في الاشكال اللي بتتخطبلها
ياترى هي اللي بختها مايل ..؟
ولا الشباب الوحشين .. بقم أكتر من الزبايل

ودعت ربها بعين مدمعة .. يريحها من الأشكال المرقعة
اللي كانت السبب
في خيبتنا العربية المبقعة



و لسة مخبوطة بتعاني الخيبة ورا الخيبة

لاتنسوا تتابعونا لنشوف شو صار معا

جائني يا قراء يا كرام .. أنه وبعد ان حصلت مخبوطة على الطلاق ..
بدأت حياتها تزداد سواد .. بعد ان عصفت بها الخيبات الشداد

عرسان خايبين ومن السطوح واقعين ..
خصوصا .. بعد ما مخبوطة
عدت التلاتين
وحصلت على اللقب البائس ..
من وزارة تلقيب العوانس
اللي بتطلق القاب مخزية .. على كل امرأة حزينة ومبتلية

*************************************************

ام العريس جت ...
- والله يا جماعة بنتكوا ما تتعيبش .. بس الولد لما عرف عمرها ما رضيش وقال انا عايز وحدة اصغر , قلتله يا ابني تعالا شوفها بس .. قالي لا يا ماما ما اتجوزش وحدة في السن دي مش عايز اشوفها

ومواقف معكوسة :
تررن تررن
- آلو ... مخبوطة
- ايوة يا بشمهندس
- ماما .... هي بتقول انك كويسة وكل حاجة بس .. يعني ....
- سني مش عاجبها مش كدة ؟
- لا هو مش بالزبط .. هي قصدها ان موضوع الخلفة هيكون ...
- خلاص فهمت .. مع السلامة


وفي وسط هذه المعمعة التي تتخبط فيها مخبوطة

تررررررررن تررررررررن

انا : آلو .. أهلا ازيك عاملة ايه ؟
هي : راجل مطلق مراته جديد .. 39 سنة .. رتبة مقدم في الشرطة , سألني عنك .. ويطلب تحددوا معاه معاد ييجي يزوركم في البيت ... اقوله ايه ؟
- ما تعرفيش عنه حاجة تانية ؟ .. شخصيته عاملة ازاي ؟
- انا اتعاملت معاه شوية في حدود الشغل .. والله اللي شفته انه محترم اوي .. مقتدر مادياً .. تفكيره متفتح .. وظريف جدا ودمه خفيف ..
- بجد دمه خفيف ؟؟؟؟؟؟؟؟؟؟؟؟؟؟؟
( صفة افتقدتها بشدة في كل اللي اتقدمولي واتخطبتلهم قبل كده .. كانوا يعزوا النكد زي عنيهم )
- اللي اعرفه لما كنا بنعمل شوية شغل معاه كنا طول الوقت هنقع على الأرض من كتر الضحك ..
- وااااو ! ... طب ما تعرفيش طلق مراته ليه ؟
- بصراحة لأ .. بس اسمع انها كانت ست مفترية
( عريس الاحلام وصل يا جدعان )
- طب اوكي هكلم بابا ولما نحدد معاد مناسب هبقى اتصل بيكي .. سي يو

كلمت مخبوطة باباها وحددلها موعد عشان تيجي ام العريس تشوفها وبعدين ييجي هو يشوفني حسب التقاليد الحمضانة

هي : آلو .. مخبوطة
- ايوة
- الراجل كلمني .. وقال انه هيجي بنفسه ومش هيجيب معاه حد.. لأن هو اللي هيتجوز مش مامته .. قال انه مش صغير على الكلام ده

والله برافو عليه .. كتير اوي بتيجي الستات تبوظ الموضوع قبل ما يبتدي ... بعد ما بقينا في زمن الام فيه بتدخل في ادق التفاصيل وابنها قاعد جمبها زي التلميذ ..
شوية شوية يحط صباعه في بؤه ...
يا جماعة .... انا ابتديت اعجب بشخصية الراجل ده


وجاء اليوم المنتظر


مرات اخويا : البسي حاجة محزقة .. حطي مكياج فتاك .. انتي ما بتشوفيش البنات بيعملوا في نفسهم ايه لما ييجي عريس ..
- ما بحبش المبالغة
- انتي فاكرة نفسك في فرنسا ؟ ... الناس هنا ما بيفهموش الكلام ده .. الناس هنا بتيجي تتفرج على عروسة المولد المتزوقة .. مش على أدب البنت وأخلاقها .. !


وجهزت مخبوطة على سنجة 1000 ...
بقى عندها عاهة نفسية عايزة تغطي عليها .. وهي سنها .. ما بقتش صغيرة وواثقة من نفسها زي زمان ..
بسبب المجتمع الندل
ولأنها اقتنعت ان الناس مش بتبص على العقل ولا بيفهموا في الذوق .. بقت عايزة تاخدهم على قد عقلهم .. عشان تتجوز وتعيش زي بقية البنات

و دخلت مخبوطة الصالون ..

- السلام عليكم ...
العريس وقف : وعليكم السلام ورحمة الله ... بسم الله ماشاء الله
ده انت اللي بسم الله ماشاء الله .. في بيتنا رجل وسيم ! .. طول بعرض وعضلات ! .. ساحر النظرات جميل الابتسامة .... علامة الصلاة واضحة على وشه ..
شكله كده يدي على راجل محترم ...

العريس : ازيك يا انسة مخبوطة ؟
انا بصوت متردد : الحمدلله ..

العريس بص لمخبوطة .. وسرح .. انا بخاف اوي من اللي بيسرحوا دول .. اوي

بابا : ايوة كمل يا ابني .. قلتلي والدك توفى امتى ؟
العريس فاق من سرحانه : هه ؟ .. آه .. توفي سنة 2005 ... قصدي 1995 .. لا لا .. آه صح صح 1995 ..

مخبوطة شافت منظر العريس وهو متلخبط في تاريخ وفاة والده وماقدرتش تمسك نفسها من الضحك ... عبيط ده ولا ايه !
يا مخبوطة يا جامدة خليتي الراجل يخرف

العريس شاف ضحكة مخبوطة على عبطه اتكسف ووشه بقى احمر .. اختشي يا مخبوطة عيب عليكي تحرجي الراجل !

العريس : آنسة مخبوطة .. عايزك تعرفي عني ..
( أيوة ؟ خير ؟ ... اتحفني ؟.. انا تعبت منكوا اوي ! )

- انا انسان بسيط جدا .. وطيب جدا .. انا وزوجتي ما كناش متفاهمين .. واستحملتها 17 سنة .. و

( انت هتعملي فيها امينة رزق ! .. والمطلوب مني اصدق دور الضحية ده ! ..هو في ضحية عضلاتها منفوخة كده ؟...)


واستمر الحوار بشكل طبيعي بين العريس وأبو مخبوطة ومخبوطة .. أبدى خلاله العريس احترامه الشديد لفكر مخبوطة ورغبتها في استكمال الدكتوراه ..
يا سلام .. عريس متحضر .. بس يارب يكون متحضر بجد
مش زي اغلب العرسان في اول لقاء
بيمثلي دور الشاب المتفتح العاقل الراسي
لحد ما اكدب نفسي واقول مش ممكن يكون ده عربي النشأة
تلاقيه فرنساوي ولا سويدي

وبعد كده
اكتشف انه اكبر شخصية رجعية في تاريخ البشرية
وانه لو كان جاي من قبائل اليويو كان احسن

ربنا يستر وما يطلعش عريسي يويو هو راخر



وبعد ما العريس مشي ..

بابا فرحان : ايه رأيك .. ربنا عوض صبرك خير .. الراجل من هيئته باين محترم وابن ناس
انا : صح يا بابا فعلا ..
ماما فرحانة اوي : الحمدلله الحمدلله


وهيييييييييييه هتجوز

سأل ابو مخبوطة على العريس سمع عنه كل خير .. ودقق في السؤال عن سبب تطليقه لمراته .. واتأكد انها كانت ست مفترية
وتعرفت مخبوطة اكتر على عريسها .. الله دمه خفيف اوي
وبيعاملني بذوق .. يا سلام
وكريم وبيبعتلي هدايا ...
مش زي البخيل اللي كان قبله



وقرينا الفاتحة ..
وكتب الكتاب اتحدد بعد اسبوع
والفرح بعد شهر
لولولولولولولولولولوي

ورجعت الحياة تدب في مخبوطة مرة أخرى .. والدنيا بقت حلوة من تاني .. واللي فات مات وأصبح ذكريات ..
ترررن ترررن

خطيبي : يا صباح الفل
انا : صباح النور
- انا همر عليكي الساعة 1 عشان نروح نختار صالة الفرح
- اوكي ..

وصل خطيب مخبوطة .. وخدها وراحوا الصالة .. فندق فخم .. صالة تحفة .. الورد في كل مكان .. على السلم .. على الأرض .. الكوشة جنان .. ترتيبها يجنن ..

الراجل المسؤول عن الحجز : ايه رأيكوا ؟
خطيبي : ايه رأيك يا مخبوطة ؟
انا : حلوة اوي ...
خطيبي : على بركة الله
الراجل : اتفضلوا معايا نقوا شكل التورتة ..

فتح الراجل الكمبيوتر وقعد يفرج مخبوطة على نماذج لتورتات افراح تهبل ... كلهم احلى من بعض

انا : دي حلوة اوي .. بكام دي ؟
الراجل : دي 350 دولار يا افندم ..
مخبوطة اتكسفت وبصت على خطيبها تاخد رأيه لأن هو اللي هيدفع
انا : ايه رأيك ؟
خطيبي : اللي تحبيه ..
الراجل : في أسعار اقل لو تحبي ..
مخبوطة : اوكي وريني
- دي بـ 320 .. دي 290 .. دي 250 ..
مخبوطة بصت لخطيبها عايزاه يتكلم : .. ايه رأيك ؟
خطيبي : نقي اللي انتي عايزاها يا مخبوطة انا مش هتدخل في اي حاجة انتي بس تؤمري ..
( ده ايه الهنا اللي انا فيه ده .. مش قادرة اصدق !! )


الراجل : تحبي لون التورتة يكون ايه ؟
انا : بمبي ..
- كلها بمبي ؟
- ايوة كلها بمبي ..
( بمبي بمبي بمبي )

وحجزنا الصالة واخترنا تاريخ الفرح بعد شهر .. واخترت شكل الزفة ... والتصوير .. وشكل الخدمة .. ونوع الورد ...

الراجل لخطيبي : تحب تدفع دلوقتي كاش يافندم ولا على دفعات ؟
خطيبي : لا مش دلوقتي همر عليك بكرة ان شاء الله انا وواحد صاحبي وندفع المبلغ اللازم
( آآآآه انا الفار ابتدى يلعب في عبي )

وخرجت مخبوطة من الفندق هي وخطيبها .. وخدها على حتة هادية يعزمها على حاجة ساقعة .. وأثناء القعدة ...

- فاضل ايه يا مخبوطة كده ؟ شوية عفش جديد للبيت .. فستان الفرح .. وانتي بقى تجهزي نفسك لما نكتب الكتاب وتاخدي المهر ..
- ايوة ..
- مخبوطة .. مش عايزين كسل .. تنزلي تشوفي فستان وتجحزي عند الكوافير من دلوقتي لأن احنا في موسم صيف ومليان أفراح والحجز بقى صعب ..
- ان شاء الله .. بس مش لما نكتب الكتاب الأول بعدين ادور على الفستان ؟
- هنكتب الكتاب خلال الاسبوع ده المهم انتي تبقى نشيطة كده وتشدي حيلك عايزين نخلص من العك بتاع الفرح ... يلا قومي نمشي
- اوكي ..

( الحمدلله ربنا كريم مين كان يصدق انها هتفرج عليا من وسع كده ! )

راحت مخبوطة وقفت قدام باب المحل لحد ما خطيبها يدفع الحساب .. في الوقت ده مر شاب صغير وبص لمخبوطة وعاكسها .. دورت مخبوطة وشها وسمعت صوت من وراها
زي زئير الأسد ..
سلام قول من رب رحيم !!

خطيبي بينده على الشاب اللي عاكسني : انت يا ( ... ) .. تعالا هنا يا ابن الـ ( ... )
انا : ...
( ايه الألفاظ دي ؟! )

الشاب رد على خطيبي بنفس الألفاظ المهذبة..
وراح خطيبي ومسك فيه ونزل فيه بوكسات وشتايم والناس اتلموا علينا وانا بقيت واقفة مصدومة مش مصدقة ...
ايه الراجل المرعب ده !

جه خطيبي ووشه لونه بنفسجي من العصبية : يلا بينا نروح ... يلاااااااااا
انا : حاضر حاضر ..
راكبة جمبه في العربية منكمشة على نفسي وخايفة انطق بكلمة
هو بعصبية : بقولك ايه .. رقمك مش عاجبني .. صعب اوي .. لازم تغيريه ..
انا بدون نقاش : حاضر
- هجيبلك شريحة تانية .. ترمي اللي عندك دي وتحطيها .. فاهمة ولا اعيد الكلام تاني ؟؟؟؟؟؟؟؟؟؟
( لا تعيده ايه ! .. هبلة انا عشان اخليك تعيده ؟! .. منتا مش هتعيده بالكلام .. هتعيده بحركات رياضية تخليلي جفوني عبارة عن لوحة سيريالية متضاربة الألوان ! )
بدون ادنى مناقشة : اوكي ..


لما وصلت البيت :
ماما فرحانة : حجزتوا الصالة ؟ ... حددتوا موعد الفرح ؟؟؟؟
انا وما زال الذهول مسيطر على الوضع عندي : ... آه
- مالك في ايه ؟
انا وما زال الذهول مسيطر على الوضع عندي :
انا اتخطبت لراجل متوحش .....!


وطول اليوم مخبوطة بتفكر ..
ياترى ممكن اعيش مع راجل بالعصبية دي
وانا اعضائي سليمة وكاملة العدد ؟
الظاهر يا بت يا مخبوطة .. انك هتزوري المستشفى اللي جمبكوا كتير
ابقى اعملي من دلوقتي علاقات طيبة مع الطاقم الطبي اللي هناك ... خصوصا سواقين الاسعاف
يعني مرة كوباية شاي .. مرة سندوتشات جبنة
يعني ... زبطي نفسك
الاحتياط واجب برضو




وترررررن ترررررن
ده هو .. انا خايفة منه اوي
- آلو ..
- آلو ازيك .. بتعملي ايه ؟
- الحمدلله .. قاعدة على النت ..
- النت ! .. وبتعملي ايه على النت ؟
- بلعب بلياردو ...
- بتلعبي بلياردو ولا بتكلمي حد ؟
- حد زي مين يعني ؟
- لا ما تاخديش في بالك ... مخبوطة نفسي اسألك ... ازاي وحدة زيك لحد النهاردة ما اتجوزتش ... ماكانش حد يتقدملك؟
- لا كان في ناس بيتقدمولي واتخطبت كزا مرة و ما بيحصلش نصيب ...
- اتخطبتي ! ... اتخطبتي ازاي يعني ؟؟
- يعني قراية فاتحة او كتب كتاب ... انت ما تعرفش ؟
- كتب كتاب ؟!!!! .... لا مش عارف هعرف منين ؟؟؟؟؟
- من الجماعة اللي سألتهم عني !!!
- لا محدش قالي حاجة !... يعني انتي دلوقتي مطلقة ؟!!!!!!!
- مالك في ايه ؟ انا كان مكتوب كتابي بس , مش متجوزة .. وبعدين انت زعلان ليه ؟ ما انت كمان مطلق
- ايوة بس انا كنت صريح , انما انتوا خبيتوا عليا !!!!
- انا ما خبيتش عليك حاجة ! ... لو بخبي عليك ماكنتش قلتلك دلوقتي اني كنت مخطوبة ! ...
- انا اخطب واقرا الفاتحة وفي الآخر اكتشف اني خاطب مطلقة ؟؟؟؟؟؟؟؟؟
- تقصد ايه ؟؟
- اقصد ان محبش حد يضحك عليا
- ايه الكلام ده .. لو سمحت ما تكلمنيش بالطريقة دي
- لا انا اتكلم زي ما انا عايز ... واعتبري الموضوع منتهي ..
- براحتك .

وطراااااااخ قفلت مخبوطة السكة في وش خطيبها ..
وقفلت موبايلها وهي بتعيط
الظاهر كده ان النحس اشتغل ..
وما قالتش لمامتها عشان ما تتقهرش ..
وخافت تقول لباباها عشان ما يتنرفزش

وبعدين يا مخبوطة في الحالة دي ؟!!
ماهما العرسان بيكونوا كويسين في الأول ..
ليه عند نقطة معينة
بيتحولوا لغربان سوداء تنعق بكل ما هو مؤذي
ليه بيبقى قبل الفاتحة آلان ديلون
وبعد الفاتحة محمود المليجي
وبعد كتب الكتاب .... شعبان عبد الرحيم
ليه ليه ليه !!


تاني يوم :
بابا : مخبوطة .. مخبوطة اصحي .. خطيبك عايز يكلمك ..
انا : ايه ! ..
فضلت ساكتة وباصة للموبايل بتاع بابا وخايفة اخده منه ..
بابا لاحظ ان عنيه وارمة من العياط .. بس من غير ما يسألني ليه اداني الموبايل وقالي : خدي كلميه .. شوفي هو عايز ايه ..
وخرج من الأوضة
وخدت الموبايل وبصوت مخنوق : آلو
- آلو .. مخبوطة .. انا آسف جدا .. ارجوكي سامحيني ماكانش قصدي ..

قالتله مخبوطة انها سامحته .. يلا .. يمكن سحابة صيف وتعدي بلاش نكبرها ..


وفي يوم : ترررن ترررن ..
خطيبي بيزعق : آلو .. انتي فين كل ده .. ساعة وانا عمال ارن !
انا : كنت بصلي !
- آه .. انا بعتلك شوية اكل وحلويات مع البواب ..
- ليه تتعب نفسك كده ... ماكانش له لازمة ..
- انا عايزك تتخني ..
- اتخن ! لا انا كدة كويسة .. ده انا حتى عايزة اخس عشان الفرح ..
- لا تخسي ايه ! ... انتي لازم تبقي فيل .. عارفة يعني ايه فيل ؟؟
( هو أمر عسكري ولا ايه ! عشم ابليس في الجنة )
- طيب .. المهم .. دفعت حجز الصالة ؟
- هه .. آه .. دفعتها ..

رن الجرس ودخل البواب شايل اربع كياس كبار مليانين من كل ما لذ وطاب .. آه يا خبيث ... بتجيب الاكل قدامي عشان تكسرلي الريجيم وتحولني لفيل الاحلام اللي بتتمناه ! ..
عمال بتنفخ فيا زي العجلة !

ولكن .. وللأسف
ماقدرتش مخبوطة تقاوم .. الفجع اللي فيها تمكن منها
وكلت منهم ووزعت الباقي على اخواتها ...

واختي المفجوعة تقولي : والله خطيبك ده يا مخبوطة مية مية
انا : ايوة هو يحرق في اعصابي وانتوا تاكلوا


وفي يوم : تررررررررن ترررررررررن ......
انا : آلو
خطيبي : انتي فين ؟؟؟
- كنت نايمة ...
- انتي ماعندكيش قلب ؟ لو ما اتصلتش بيكي ما بتتصليش بيا .. اشمعنى انا بكلمك مرتين وتلاتة في اليوم !
- منا اتصلت بيك اول امبارح !
- اول امبارح !!! كتر خيرك اوي ... بكرة لما نتجوز هطلعه كله على جتتك
( بلعت مخبوطة ريقها )
- انت عصبي اوي على فكرة
- ايوة لما اتنرفز معرفش اللي قدامي ..
- طب بصراحة كدة ... كنت تضرب مراتك ؟
-هي اللي كانت تستفزني ...
( يا نهار زي بعضه !!! )
- ما تفهمينيش غلط ... انا كنت اضربها لأن هي كانت غبية ... بس انتي حاجة تانية ... معقولة يعني هضربها من غير سبب !!!
- عارف لو اتجوزنا ومديت ايدك عليا .. عمرك ما هتشوف وشي تاني ..
- يا بنتي بقولك انتي حاجة تانية ... ما تقارنيش نفسك بيها !

والله منا مستريحالك .. لكن هنعمل ايه .. هي دي الاصناف الموجودة ... مفيش حد عدل ...
وبما انك يا مخبوطة كده كده قرفانة عيشتك من العنوسة ... غيري نوعية القرف وخليها قرفانة عيشتك من الجواز ...
واهو كله قرف في الآخر ... وادينا بننوع



وفي يوم : ترررررررررررن ترررررررررررن
يوووووووه احنا مش هنخلص من الاتصالات دي بقى ...
خطيبي بيزعق : آلو .. كنتي فيييين ؟؟؟؟
انا : في الحمام !
- آه طيب ...
- عملت ايه في موضوع كتب الكتاب ؟
تغيرت نغمة صوت خطيبي خالص وبقت وديعة اوي :
- مخبوطة .. انا ظروفي عاكستني شوية .. وكل شوية تطلعلي مشكلة في موضوع الفلوس ..
- طب والفرح اللي بعد عشر ايام .. والصالة اللي حجزناها !
- هو انا ما قلتلكيش اني لغيت الحجز ؟
( ايه !! .. انا كان قلبي حاسس ان يوم حجز الصالة ده كان كله تمثيل في تمثيل ! ... مناخيري شمت ريحة الندالة اللي اقدر اميزها عن بعد 8 كيلو ... لكن شككت في قدراتي المخبوطية ... انا آسفة جدا لنفسي )
- ... امتى ؟؟
- أأأ .. امبارح .. وان شاء الله لما يبقى معايا فلوس وربنا يفرجها نحجز وحدة احلى منها ...
انا بنبرة مخنوقة ودموعي هتنزل : والفستان اللي حجزته !
- هي جت على حتة فستان ابيض .. انتي مش صغيرة على الكلام ده .. والله انتوا الستات عقلكوا صغير خالص ...

اتصدمت مخبوطة في تصرفات خطيبها المريبة ...
ودخلت في صراع بينها وبين نفسها ....

مخبوطة التعبانة : اتجوزيه يا مخبوطة .. اي حاجة احسن من قعدتك دي .. انتي عندك 31 سنة .. هتتتجوزي امتى بس ! مشاكل الجواز ارحم من مشاكل العنوسة ...

مخبوطة المؤمنة : اللي له نصيب في حاجة هياخدها .. ومش هيحصل الا اللي ربنا كاتبه


مخبوطة الواعية : الراجل ده باين عليه بتاع نسوان .. وفوق ده كداب وعصبي ودراعه سابقة عقله .. .. ده بكرة هيهريكي ضرب .. انتي مش شايفة عضلاته وشكل دراعه عامل ازاي ؟؟ .. كف واحد منه يوقع صف سنانك الشمال اللي هو اساسا تركيب ! .. وكل شوية بقى ترجعي للدكتور تقوليله معلش يا دكتور ثبتهم تاني اصل جوزي اداني بالقلم امبارح ! ... برستيجك هيتبهدل يا مخبوطة !! .. لا خليكي كده احسن ... قاعدة في بيت اهلك محترمة وسنانك في بؤك .. اه




وفي يوم : تررررررررن ترررررررررن ..
هفففففففففففففففففففف وبعدين بقى سرعتوني وعقدتوني من جنس الموبايلات كله
انا : آلو
خطيبي : آلو .. مخبوطة عايزك في موضوع
- خير ؟
- اتصلي على الرقم ده وقولي انك خطيبتي ..
- رقم مين ده !
- طليقتي ..
- ايه !!!!! ...
- مالك بتزعقي ليه ؟ لازم اثبتلها اني هتجوز ست ستها .. الهانم بتقول للناس انها مش مصدقة اني خطبت وبكدب عليها .. شايفة القرشانة !
- عايز تثبتلها ليه انت مش طلقتها مالك بيها ! .. انا لا يمكن اكلمها انت عايز تغيظها بيا !
- عشان خاطري عشان خاطري
- لا مش عايزة ... انا ما بحبش كيد النسوان ده !
- هتنفذي اللي بقولك عليه ولا لا ؟؟؟؟؟
- لا
- انتي دماغك ناشفة زي دماغ الـ ( ...... ) انتي فاكرة نفسك مين يا بنت الـ ( ...... )
- كل اللي بينا انتهى !!!!






وانتهت آخر خطوبة ... في حياة البت مخبوطة
بعد الخناقة مع خطيبها والربكة ..
اللي خلتها قفلت في وشه السكة
حاول يتصل بيها بالحاح
طالب المغفرة والسماح
لكن مخبوطة .. ما بقتش بالخطوبة مبسوطة
لأنه راجل ما لوش أمان ... وفي عقله حبتين جنان
اخلف بوعده وخيب أملها
وكدب عليها وضيع احلامها
مابقاش في رجالة تحترم مشاعر الستات
بعد ما زمن الرجولة عدى وفات
عرفتوا ليه البنات من غير جواز بتكبر ؟
لأن أصناف العرسان .. بقت تشل وتقهر

وحطت مخبوطة ايدها على خدها ... بتفكر في الاشكال اللي بتتخطب لها
داعية ربها ساعة فجرية .. يخلصها من هذه النوعية
اللي كانت السبب
في الخيبة العربية القوية



انتظرونا في خيبات متفرقة مع العرسان وامهاتهم

جائني يا قراء يا كرام .. انه وفي احدى الأيام
من أيام صاحبة البخت المايل
ميلان عظيم وهايل
البت مخبوطة ... اللي شافت الهوايل

جت قريبتها وفي ايدها ام العريس .. عشان تتفرج على صاحبة البخت التعيس
و تعمل لمخبوطة كشف هيئة ..
قبل ما ييجي الواد ابنها.. بطلته العايئة

بيقولوا انه طالب دكتوراه في مجال الاجهزة الطبية
يعني عريس لقطة ..
ومواصفاته مية مية


تررررن ترررررن ...

ماما : آلو ..
وحدة قريبتنا : آلو .. ازيك يا ام مخبوطة ..
- انا الحمدلله ازيك انتي ؟
- تمااام التمااام .. اخبار مخبوطة ايه ؟
- كويسة .. الحمدلله على كل حال ..
- بصي من الآخر كده .. عندي عريس لمخبوطة انما ايه .. ماجالهاش قبله ولا هيجيلها بعده ..
- ايه ! .. والله ؟ .. بتتكلمي جد !
- اومال بهزر !
- بيشتغل ايه ؟؟
- قال بيشتغل ايه قال .. ده يا ستي على وشك انه ياخد الدكتوراه في هندسة الأجهزة الطبية ..
- بجد !!
- وبيشتغل استاذ في كزا جامعة .. وكل شهر بيقبض الشيئ الفلاني .. شقته جاهزة وعفشه جاهز ومش ناقصها الا العروسة .. ولما امه سألتني ماتعرفيش بنت حلال نخطبها له قلتلها موجودة طبعا ... مخبوطة ومفيش احسن من مخبوطة ..



هي الست دي بتتكلم جد ! ولا بتهزر !
لا جد يا مخبوطة !
ده عريس ديجيتال يتمتع بتقنيات عالية !
مش ناقصه حاجة
غير انك تشوفيه !
واعتقد ان واحد زي ده مش هيكون له علاقة لا بالشامبانزي
ولا بأي شخصية محترمة من الشخصيات المقيمة في
جنينة الحيوانات العريقة اللي بيعملوا ليكي زيارات دورية في الصالون كل شوية


تررررن تررررن ...

قريبتي : آلو .. المعاد بكرة الساعة 6...


ياااه على طول كده !
احيي الناس النشيطة اللي شايفة شغلها كويس

غالبا في الحالات دي الحركة التلقائية اللي بترافق سماعي لتحديد موعد اللقاء
ان ايدي بتطول لوحدها وبتروح على بيانات الدولاب ..
وبضغط على ايقونة اللبس المناسب حسب تاريخ الشراء الاحدث .. يا سلام ..
طول عمرك شاطرة ومنظمة ومبرمجة يا بت يا مخبوطة

وجاء اليوم المنتظر ..

رن جرس الباب .. ودخلت قريبتي ومعاها ام العريس .. اللي قعدت تقلب عينيها في الشقة شمال يمين ..
للأعلى وللأسفل .. شرق وغرب
ايه الحكاية ؟؟
هي جاية تخطبني انا ولا تخطب الشقة !


خرجت اسلم على ام العريس وقربت منها اقدملها العصير ملامحها لا تبشر بخير الحقيقة

لو ابنها شبهها تبقى مشكلة .. بجد مشكلة

ربنا يستر !


ام العريس : ماشاء الله ... اللهم صلي على رسول الله .. ازيك يا ....
انا : مخبوطة
ام العريس : عاشت الاسامي .. بتشتغلي بقى يا مخبوطة ؟
انا : لا يا طنط
قريبتي : ان شاء الله لما تخلص الماجستير هتلاقي شغل محترم
(هـهـهـهـه ... متفائلة اوي قريبتي دي )
ام العريس : طبعا هم يطولوا !
ماما : والدكتور ان شاء الله لو حصل نصيب هيسكن معاكوا في نفس البيت ؟
ام العريس : آاااااه اومال ايه ... ابني عنده شقة جاهزة في الدور التاني ديكور ايه وعفش ايه دفع فيها الشيئ الفلاني .... وان شاء الله بنتك هتنورها ..
ماما : ربنا يجيب اللي فيه الخير ...


افهم من كده ان كل حاجة ماشية تمام ؟
ما دام ام العريس ختمت عليا الاوكي ..
يبقى احط في بطني بطيخة صيفي واعتبر ان الجوازة تمت خلاص ...
اومال ايه !
ام العريس هي الورقة الرابحة

وبمجرد ما مشيت ام العريس ...
دخلت مخبوطة اوضتها .. و ما لبثت ان غرقت في بحر
الأحلام والتخيلات ..
خصوصا الأحلام بتاعت انتشار خبر الخطوبة
وااااااااو

ويحتل الخبر العناوين الرئيسية في اخبار الجزيرة ..
والمذيعين النضاف ولاد الناس دول
بيذيعوا الخبر ..

احم احم


سيداتي سادتي أسعد الله مسائكم بكل خير ..
نقدم لكم حصاد اليوم من قناة الجزيرة نستهلها بالعناوين الرئيسية ..

وتطلع صورتي على الشاشة بقى وهما واخدينلي لقطة قريبة من الجمب كده وحواجبي معقودة زي كبار الشخصيات
ويرافق عرض الصورة صوت المذيع

تمت اليوم اولى المقابلات الخاصة لمشروع خطوبة الفتاة مخبوطة .. من عريس بيحضر الدكتوراه
التفاصيل مع مراسلنا من بيت مخبوطة

المراسل
بيتنحنح ... وبيقول الخبر بطريقة الالقاء الفنية اياها :

ليس العجب في خطوبة مخبوطة في حد ذاتها ..
ولكن العجب يكمن في مواصفات عريسها ..
حيث انه طالب للدكتوراه في مجال الاجهزة الطبية يبلغ الثلاثين
لديه شقة مجهزة بأفخم الاثاث
وهو ما لم نعهده في عرسان مخبوطة القادمين من مستشفيات الامراض العقلية .. وهنا نسأل مخبوطة :

- مخبوطة ... ماذا تتوقعين من نتيجة المباحاثات التي تجري حاليا بين العريس وامه ؟
( أرد عليه بقى وانا متقمصة دور عمرو موسى )
- الحقيقة احنا متواصلين مع اطراف النزاع .. أأأ ... قصدي مع ام العريس وقريبتي اللي جرجرتها ... وهنحاول نتوصل لصيغة كويسة لهذه المبادرة العرسانية ان شاء الله ترضي الطرفين ..
- هل تتوقعون ما هو اسوأ .. كأن العريس يطلع شبه امه مثلا ... ؟
- احنا طرحنا كل الاحتمالات على الجدول الزمني المخصص لخارطة الخطوبة دية .. ولا اعتقد ان شبهه بوالدته هيكون له تأثير في فشل هذا المشروع ..
- ولماذا لا تتوقعين ان يكون له تأثير بحكم ان القبول شرط اساسي لانجاح هذه المبادرة ؟
- لأن سن احد الاطراف .. اللي هو حضرتي .. احم احم .. لا يسمح لي برفض العريس عشان سبب كهذا ..
- هل هذا يعني انكم تتبعون مقولة.. زي ما يطلع يطلع ؟!
- طبعا !! .. أأأ .. قصدي يعني .. بالتأكيد هندرس القضية مع الاطراف المعنية وسنتخذ القرارات المناسبة ..


يا مخبوووووطة يا جااااااامد
ياللي بتعرفي تزوغي من اسئلة المراسل الرخم بدبلوماسية
ما تخرش المية..
طبعا !
مش متقمصة دور عمرو موسى !


وفتحت مخبوطة عينيها
يااااااه .. امتى ييجي اليوم ده ... متخيلة الحبايب والقرايب وهما قاعدين قدام التليفزيون وبيتفرجوا وبيفركوا في ايديهم وبيمصمصوا في شفايفهم ..

شعور اكسلانت صراحة


قريبتي لام العريس : ايه رأيك في البنت ؟
ام العريس : ماشاء الله ما تتعيبش ربنا يجعلها من نصيبنا ..
- يعني نحدد يوم عشان الدكتور ييجي يشوفها ؟
- لا .. أأأ .. آه .. يعني هروح اكلمه الاول واشوف هو فاضي امتى وان شاء الله هتصل بيكي واقولك ..
- ان شاء الله


وفات يوم .. واتنين .. وتلاتة .. واسبوع ..
وام العريس لا حس ولا خبر ....
قريبتي اتصلت بيها تشوف هما غطسوا فين

ماهو احنا لازم نفضل نطاردهم ونحاصرهم لحد ما تيجي الكسفة منهم .. آه .. نعمل اللي علينا وزيادة
عشان ننام وضميرنا مستريح


- قررتوا ايه بخصوص البنت ؟
ام العريس : لا خلاص مفيش نصيب ..
- ليه بس .. دي مخبوطة بنت حلال وكويسة ؟
- ظروفنا ما تسمحش دلوقتي

اخصصصصصصصص !!
يادي الكسفة ...
انا بقدم اعتذاري لقناة الجزيرة وجميع العاملين فيها على سوء التفاهم اللي حصل
ايم سوري ياجماعة

وكالعادة يا خوانا
العريس السابق اتجوز وخلف وعاش حياته عادي
لأن سن التلاتين بالنسبة له طبعا يسمحله بالزواج ممن يشاء
مش متضرر منه
مش زينا احنا .. مجتمع ندل صحيح !!

لحد ما جت الصدفة .. و وحدة معرفة طلعت زميلة العريس ده في الشغل .. وجه حضرته يفكرها بأمجاده القديمة وشهامته المفرطة هو وامه في التعامل مع بنات الناس ..
وسألها :

- انتي تعرفي فلانة ؟
- ايوة .. انت كنت متقدملها صح ؟
- ايوة ومحصلش نصيب
- ممكن اعرف ايه السبب ؟
- امي قالتلي انها متكبرة .. وقاعدة مكشرة طول الوقت ودمها تقيل .. وشايفة نفسها عشان بتعمل ماجستير وهتتعبنا معاها
- لا والله الشهادة لله البنت مش كده خالص ! .. دي ظريفة جدا !!
- ظريفة ايه والدتي قالتلي ان البنت ما احترمتهاش لما راحت تشوفها !
- هه ؟؟!!!


واتخنقت مخبوطة من هذه الأخبار ..
اللي ترفع الضغط وتفرقع الفشار
ليه ام العريس
تقول اني ما عبرتهاش ... واني كشرت في وشها
وحبة احترام ما اديتهاش ...
كل ده عشان مخبوطة واعية .. وبتعمل ماجستير ودراسات عالية
هتقولهم ده حقي ومش حقي .. وما يقدروش يتحكموا فيها
ويا داهية دقي

وحطت مخبوطة ايدها على خدها .. بتفكر في امهات العرسان اللي بتتقدملها
داعية ربها ساعة فجرية .. يخلصها من هذه النوعية
اللي كانت السبب
في خيبتنا العربية القوية


استنونا و قصة مخبوطية جديدة....

جائني يا قراء يا كرام .. انه وفي احدى الايام
حتة موقف حصل
من خطيب مخبوطة
اللي كان كاتب كتابها وعنها وانفصل


تررررن تررررن .....

- آلو .. مخبوطة
- ايوة
- انا مش هاجي عندكو في الويك اند ..
( بجد !!! )
- خير في حاجة ؟؟
- هطلع رحلة انا وصحابي يومين كده
- مع الف الف سلامة


خطيبي ده .. الدكتور البخيل اللي قبل كده اتكلمنا عنه
كان طالب دراسات عليا مغترب بعيد عن اهله ..
وبعد ما كتب كتابي
اهلي حبوا ينتشلوه من الوحدة والضياع
فقالوله الجملة اللي جابت لمخبوطة الكافية وقلة العافية
البيت بيتك يا ابني واحنا اهلك في الغربة
خطيبي بقى
استغل الوضع ده استغلال اكسترا
كان بييجي خميس وجمعة يبلط عندنا ..
اصل الايام دي اجازة فرصة اجي افسح مخبوطة وافرسها
وشوية شوية
بقى ييجي سبت واحد ..
اصل الايام دي مفيش محاضرات مهمة
وتلات واربع ..
اصل البروف بتاعنا وهو خارج من المحاضرة وقع على السلالم ورجله اتلوحت وهو دلوقتي في العناية المركزة

ده مابقاش يبات في سكن الطلاب غير ليلة او ليلتين في الاسبوع
وطول ماهو عندنا وهو حابسني جمبه ..
ده انا بقيت اقوم اصلي منه بالعافية !!
قاعدلي وماسكلي في ايدو ساعة العداد وبيحسبلي وقت الصلاة بالدقيقة ..
ولو اتأخرت خمس دقايق تبقى وقعتي سودة
ايه كل ده بتصلي ؟! .. ما تنامي احسن !!

لحد ما البت مخبوطة بقت تفكر بشكل جدي انها تخلص عليه
سندوتشين فول مسمومين وكله يبقى تمام


انا : آلو .. باسم ..
هو : ايوة يا مخبوطة ..
- انا هخرج مع صاحبتي يوم الخميس اتفسح شوية
- اااااااه .. ده انتي ما صدقتي بقى !!
- ما صدقت ايه انا ما شفتهاش من يوم كتب الكتاب !!
- طب ما تروحي تزوريها في البيت ولا هي تجيلك !! .. لازم يعني تخرجوا !!
- انا زهقانة من الحبسة وعايزة اخرج !! .. اشمعنى انت يعني هتخرج رحلة مع صحابك يوم الخميس !!
- يا ماما انا خارج مع رجالة مفيش معانا بنات ! .. انما انتي صحبتك دي هتتفسحي معاها ازاي ! هتركبوا تاكسي ؟ ولا المحروس اخوها اللي هيفسحكوا بعربيته ؟؟
- لا ده ولا ده .. هي هتيجي بعربيتها تاخدني ومحدش هيكون معانا .. كويس كده ؟
- وهتروحوا فين ؟؟
- لسة مش عارفة ..


خطيب مخبوطة كان هيتجنن عشان هي خارجة مع مخلوق آخر غيره ...
كان بيكره صاحباتها واخواتها البنات وعيالهم كمان ...
كان نفسه يخليها تقطع علاقاتها بكل البشر اللي عرفتهم في حياتها ..
بما فيهم امها


ولكن في النهاية ... انتصرت البت مخبوطة
وجت صاحبتها بعربيتها الشيك وخدتها وخرجوا لفسحة متنوعة في اماكن متعددة
وكالعادة .... السعادة لا تكتمل ...
خطيب مخبوطة كان يعكر تلك الاجواء باتصالاته وتحقيقاته

ترررن ترررن

- انتوا فين دلوقتي ؟ ..
ترررن ترررن
- هتروحي امتى ؟
ترررن ترررن
- ابقي افتكريني بمسج يختي ..


لدرجة ان مخبوطة عيطت وهي برا
وصعبت على صاحبتها اللي اتفاجئت من تصرفات خطيب مخبوطة !
معقولة في حد كده ؟!
ومن كتر مفاجئتها باللي حصل سرحت وهي سايقة وعملت حادثة خفيفة ...
خبطت واحد راكب عجلة ووقع على الارض ...
هو ما حصلوش حاجة
لكن كما هو متعارف عليه في بلادنا العربية
لما واحد تخدشه عربية في الشارع بيستغل الحادثة اللي نزلت عليه من السما دي
ويعمل فيها شهيد
وعايز تعويض وعلاج ونسدد ديونه ونجيب لعياله كسوة المدارس ونسفر امه للحج و و و و ...
كل ده وهو واقف على رجليه سليم زي الددبان


انشغلت مخبوطة مع مشكلة صاحبتها ونزلت من العربية وسابت الموبايل جوة ..
وخطيبها عمال يرن كل خمس دقايق وهي مش سامعة ...
لما انتهت المشكلة وروحت مخبوطة البيت شافت المكالمات والمسجات بتاعته ..
اتصلت بيه يمكن يكون حصله حاجة هو كمان وربنا ريحني منه


- آلو ..
- انتي فين ؟ ساعتين كاملين وانا بتصل كنتي فييييييين ؟
رديت عليه بقرف : حصل موقف معايا انا وصاحبتي فانشغلت معاها وما خدتش بالي من الموبايل ....
- موقف ايه ؟
- عملنا حادثة
- ايه ؟؟؟ .. بتتكلمي جد ؟؟؟ ... هاهاهاهاهاهاهاهاهاهاها
هااااااهاهاهاهاهاهاهاااا ... هاااااهاهاهاهاهاهاهاهاااااا
- انت بتضحك على ايه ؟
- ادفع نص عمري واشوف منظرك ساعة الحادثة كان عامل ازاي !

( اه يا عديم الذوق والاحساس ! .. ده بدل ما تقولي انتي كويسة ولا لا .. ده بدل ما تقولي سلامتك !! شمتان ان الخروجة بتاعتي ختمت بمصيبة ؟!!! )
- باسم ...
- نعم ..
- انت شارب حاجة ؟؟؟؟؟


وقلبت بخناقة كبيييييييييييرة
وزي ما اتعودتوا من مخبوطة الذكية
حاولت استثمار الخناقة دي ..
وقفلت الموبايل يومين عشان ترتاح من خطيبها
اللي كان بيتصل على اختها المتجوزة زي المجنون يطالب بأن تفتح مخبوطة الموبايل بتاعها ....

اختي : خطيبك ده جنني .. بيتصل بيا الساعة 1 بالليل .. و4 الفجر .. والصبح .. والضهر .. والعصر .. ايه ده هو مش عارف اني ست متجوزة !!!!
انا : عشان تعرفوا العذاااااب اللي انا عايشة فيه !


ولما فقد خطيب مخبوطة الأمل من انها تفتح الموبايل تاني ..
طب عليها في البيت عشان يصالحها ..
ويعزمها على مطعم السمك اياه ..
ويشربها شوربة العدس بالبصل ذو الرائحة النفاذة ..
كتعويض عن يومين الخصام اللي فاتوا

لبست مخبوطة وراحت لخطيبها اللي كان واقف بيستناها عند الباب ..
عشان يفسحها الفسح الفقرية بتاعته

خطيبي : ايه الشياكة دي ..
- ميرسي
- مخبوطة بقولك ايه .......
- ايه ؟
- ما تقولي لصاحبتك تسلفنا عربيتها نتفسح بيها
- نعم ؟!!





وخلال اجزاء من الثانية ... اتخانقت مخبوطة مع خطيبها
خناقة تانية
عشان رفضت تستلف من صاحبتها العربية .. وقالتله ما تستلف انت من صحابك ..
انا مش بنت شحاتة و هفية

ازاي بيعاملونا بطريقة مافيهاش احساس .. وبيطلبوا مننا
حنية ورومانسية من الاساس

ويقولي يا بنت الناس كلميني كويس ..
وهو عمال يكلمني باسلوب مهيس
ده غير خروجاته المزعجة ... وحركاته ومقالبه المحرجة

وحطت مخبوطة ايدها على خدها .. بتفكر في اسلوب خطيبها اللي هدها
داعية ربها ساعة فجرية .. يخلصها من هذه الخطوبة الفقرية
اللي كانت السبب
في خيبة مخبوطة .. الخيبة القوية



و لسا الجاية اكتر... انتظرونا و تابعونا......

جائني يا قراء يا كرام .. انه وفي احدى الايام
اتقدم لمخبوطة عمو الدكتور
اللي كان بيصلح لمخبوطة ضرسها المحفور
ايام ماكانت مخبوطة الشقية
لسة نونو في الثانوية
اما عمو الدكتور ..
فكان اكبر منها بعشرين سنة ميلادية



مخبوطة : صباح الخير يا عمو
الدكتور : صباح النور يا انسة مخبوطة ... ايه عمو دي انتي عايزة تكبريني ؟ هاهاها

( مخبوطة اتكسفت ومعرفتش ترد .. عشان كانت صغيرة اوي .. يعني قبل ما تتعلم ازاي تحط صباعها في عين الغراب اللي قدامها )

الدكتور : مخبوطة .. العصفورة قالتلي انك بتاكلي شوكولاتة وايس كريم .. مش احنا اتفقنا ما تاكليش الحاجات دي ؟؟
( هو عرف منين ! .. معقولة الدكتور مهتم بيا كده ... ياي )
- اصل صحباتي هما اللي عزموني
- هاهاهاهاهاها ... ما تسمعيش كلامهم طيب عشان سنانك مش مستحملة ... انتي في سنة كام يا مخبوطة ؟
- تانية ثانوي
- ماشاء الله ماشاء الله ...


بعد اسبوع .. كان الدكتور ده في زيارة عندنا بيطلب ايدي من بابا .. وطلع قفاه يقمر عيش ...

انا : ليه يا ماما بابا رفض العريس .. ده امور خالص
- مالكيش دعوة انتي بالحاجات دي ..
- ليه يا ماما ليه ليه ليه
- ده اكبر منك بعشرين سنة ! ... ما يروح يتجوز وحدة من سنه جايلنا احنا ليه .. انتي لسة صغيرة
- اهئ اهئ اهئ

وماكانتش مخبوطة اياميها فاهمة كلام مامتها .. وشايفة ان ابوها ديكتاتوري رفض العريس من غير ما ياخد رأيها .. وزعلت مخبوطة على العريس الامور

خسارة كنت هتخطب واغيظ صحباتي اللي معايا في الفصل
واغيظ الولاد اللي بيضحكوا عليا لما اعرفش اجاوب واوريهم اني لابسة في ايدي دبلة خلاص ما بقتش صغيرة .... آآآآآخ ليه كده بس يا بابا ... ليه

وفي احد الايام ... بعد ما مخبوطة كبرت واتخرجت من الكلية وكانت مسافرة عشان تحضر الماجستير ... قابلت الدكتور ده صدفة أثناء السفر ...

الدكتور : مخبوطة ! .. انتي مخبوطة صح ؟؟
انا .. ولسة مش عارفة مين ده : ايوة .. ؟
- انا الدكتور " فلان " فاكراني ؟
- ايوة ايوة .. اهلا يا دكتور ازاي حضرتك ؟
( بقى عنده قرعة وشكله كبير .. اتغير اوي )
- الحمدلله .. انتي اتجوزتي ؟
- لا لسة
- انا اتجوزت الحمدلله وعندي اولاد ..
( على فكرة اتجوز بنت عندها 15 سنة برضو ! )
- ربنا يخليهملك ..

وساعتها اتأخرت في العبور بسبب الاجراءات الامنية وكنت عايزة اكلم اهلي اطمنهم عليا ...
- انا لازم اكلم اهلي اطمنهم عليا .. بس مش عارفة اتصل منين !
- ... طبعا ضروري .. عن اذنك يا مخبوطة مضطر امشي ..
- اه اتفضل ...

وراح الدكتور وقعد بعيد .. وبعد فترة من الوقت .. مخبوطة بصت لقت الدكتور قاعد وبيطلع موبايل من جيبه وبيتصل ... واكتشفت انه هرب منها عشان ما تاخدش منه الموبايل تتصل بأهلها وتخسره رصيد ....
وبعد شوية عمل مشكلة مع الولد اللي في الكافتيريا عشان مبلغ هايف ... جاتك خيبة ده انت طلعت مقلب !
الحمدلله ان بابا رفضك !


وبعد ما مخبوطة كبرت .. واتعلمت واتنورت
فكرت بينها وبين نفسها
ليه الدكتور ده يتقدملها ..
مع ان كان في بنات كتير اياميها .. من اللي عايشين وساكنين حواليها
سنهم من سنه .. وقريبين جدا منه

مارضيش بيهم عشان هما في التلاتينات زيه

قال ابن التلاتين ..
مش بيرضى يتجوز وحدة فاتها القطر من سنين

وبيدور على عيلة صغيرة يتجوزها
عشان يربيها من اول وجديد ويشكلها
على كيفه وكيف عيلته من اولها

وهذه هي العادة في مجتمعاتنا الندلة ..
اللي بتطبق قوانين وتقاليد غير عادلة

وحطت مخبوطة ايدها على خدها .. بتفكر في شباب التلاتين اللي في وشها
داعية ربها بعين مدمعة .. يخلصها من الشخصيات المفرقعة
فرقعة كدابة ومن جواها عقول مطرقعة



استنونااااااااااا .. لنشوف شو في ئصص بعد عمو العريس!!!

جائني يا قراء يا كرام .. أنه وبعد فشل اول خطوبتين
لمخبوطة بسلام
وبعد ظهور مشكلة الارتباط في حياتها ..
اللي نغصت عليها عيشتها وآمالها

كانت مخبوطة الخطيرة .. واقفة عند الاسانسير
لما جت وقفت جمبها ست كبيرة
بصت لمخبوطة بإمعان ..
وسألتها سؤال الباحث الحيران


الست : انتي ساكنة هنا ؟
انا : ايوة
- في أي شقة ؟
- شقة 21
- اول مرة اشوفك ..
- اصلي لسة راجعة من السفر ...
- حمدلله على السلامة ..
- الله يسلمك يا طنط ..
- على فكرة احنا جيرانكوا اللي في العاشر ..
- أهلا وسهلا تشرفنا


ممممم
من خلال دراستي الأدبية والتحليلية لكراكتر ام العريس النموذجي ..
اقدر استنتج ..
ان الست دي هتجيبلي عريس
حيث أنه يتضح لدينا بما لا يقبل الشك
انها منشنة عليا .. نياهاهاها


وكان استنتاج البت مخبوطة الذكية في محله
الست ما كدبتش خبر وطلعت تجري لصاحبة العمارة
اللي كانت صاحبة ماما


- انا شفت بنت عند الاسانسير.. قالتلي انها ساكنة في شقة 21.. هي وضعها ايه ؟
- لا متجوزة ولا مخطوبة ايه رأيك فيها لابنك ؟
- البنت عجبتني اوي وقلت هي دي اللي اخطبها لابني .. كلمي الجماعة وخديلي معاهم معاد عشان ازورهم واتعرف عليهم ..
- ان شاء الله


الست صاحبة العمارة كانت امرأة متعاونة جدا
وتمتلك العديد من المواهب ..
ومن اهم تلك المواهب العظيمة تقديم الدعم العرساني
للبنات اللي بختها متهالك ومتآكل
زي بخت مخبوطة كده

وعلى طول .. اتصلت بماما تبشرها بأن هناك بوادر عرسانية تلوح في الأفق :


- آلو .. الست اللي ساكنة في العاشر كلمتني عن مخبوطة وعايزة تحدد معاد عشان تزوركوا
ماما : والله ؟
- انا كنت حاطة عيني على ابنها لمخبوطة ... لكن سبحان الله جت هي كلمتني ..
- ربنا يبشرك بالخير .. هو ابنها بيشتغل ايه وعنده كام سنة ؟
- دكتور متخصص عندو 31 سنة بسم الله ماشاء الله ولد زي القمر أدب ايه واخلاق ايه وذوق ايه ..
- دكتور !! .. طب تتفضل في اي وقت ....
- اقولها تيجي يوم الاربع الجاي الساعة 7 ؟
- ماشي

وانتشر الخبر السعيد
الحقوا مخبوطة جالها عريس .. !!
الحقوا .. ده عريس نضيف وابن ناس ..
الحقوا .. ده اخصائي .. وغني .. و زي القمر !!
لازم يا مخبوطة ترقي نفسك !
هو كده البني آدم لما تحصله حاجة عدلة على غير العادة لازم يرقي نفسه


ماما : انتي بتعملي ايه ؟
انا : زي ما انتي شايفة ..
- بتعلبي كوتشينة ؟!!! .. في وحدة جايلها عريس وبتلعب كوتشينة !
مرات اخويا : مافيهاش حاجة بنتسلى شوية ..
ماما : بتتسلوا ده ايه ؟ .. بت يا مخبوطة .. آخر مرة قصيتي فيها شعرك كان امتى ؟
انا : مش فاكرة .. سنة ولا اتنين ..
- يا فرحتي بيكي !! .. قومي انتي وهي .. تروحوا على الكوافير دلوقتي تقصي شعرك بدل ما انتي شكلك زي اللي جاية من الغابة كده ...
- يووووه دلوقتي يا ماما !!
- اومال امتى ؟ الجماعة جايين بكرة !!
مرات اخويا : اه يا مخبوطة وماله .. احنا ما صدقنا ييجي حد عدل ..
- ابقي كمان نقيلها حاجة عدلة تلبسها .. عايزاها تلف دماغ امه
- علم يا حماتي


خرجت مخبوطة ومرات اخوها لانجاز المهمة المقدسة
عمل نيولوك يخلي ام العريس تركع على ركبها
وتترجى مخبوطة انها توافق على ابنها

مرات اخويا : عايزين قصة سبيشال ..
الكوافير : عندكوا فرح ؟
- لا اصل جايلها عريس ...
- عريس !!

واعلنت الكوافير حالة الطوارئ في المحل
البت جايلها عريس ..
رزعوني على الكرسي .. واتلموا حواليا ..
الكوافير والمساعدين بتوعها
واختارت الكوافير ومستشاريها القصة المناسبة بعد ما خدوا بيانات وشي وقفايا

الكوافير : ايه رأيك تصبغي شعرك ؟
انا : لا لا .. ما بحبش الصبغة
- ليه ؟ .. انا ممكن اعملك لون يخلي وشك ينور اكتر ..
- هـهـهـه .. الحكاية مش مستاهلة كل ده !
- مش مستاهلة ازاي !! هما العرسان وامهاتهم بقى يعجبهم العجب الأيام دي !


بصراحة .. عندها حق
لكن برضو مش هصبغ شعري

وبعد الانتهاء من عمل الرفرش لشعر البت مخبوطة ..
وترتيبه وتنسيقه شعراية شعراية
خرجت هي ومرات اخوها من عند هذا الكوافير الوطني اللي قلبه على مصلحة بنات الأمة
وراحوا لمحل ملابس .. وقاموا بعمل بحث دقيق عن الملابس التي تتناسب مع قوام مخبوطة

انا : انا تعبت من اللف اوي !
مرات اخويا : معلش معلش ..
- ياخوفي التعب ده كله يطلع على فشوش ..
- لا يا مخبوطة .. انا حاسة ان المرة دي مش زي كل مرة
( آااااااه .. ياخوفي منك يا بدران ! )
- الله يا مخبوطة ! .. البنطلون الجينز ده تحففففة
- ايوة جميل .. بس طويل اوي !
- ما يكونش عندك فكر


وكالبرق الخاطف .. كانت مخبوطة ومرات اخوها
واقفين وجها لوجه قدام الخياطة

الخياطة : انا دلوقتي مشغولة .. تقدروا تيجوا تاخدوه بعد بكرة
مرات اخويا : لا ما ينفعش .. بكرة جاي عريس وعايزين البنطلون ضروري
- عريس !!

واعلنت الخياطة في المحل حالة الطوارئ هي كمان
واضح انهم حاسين بحالة الكساد العرساني اللي عمت ارجاء الوطن العربي ..
ولا نعني بالكساد قلة عرسان
لااااا ..
الناس دايما فاهمانا غلط
قصدنا بالكساد هنا كساد في جودة العرسان
قليل اوي ما يتقدملنا عريس مختوم عليه ختم الآيزو العالمي

وجت مساعدة الخياطة وخدت مقاسي
وفي دقايق كان البنطلون تحت مكنة الخياطة
وترررررررك تررررررررك

البنطلون جاهز

وجه يوم الأربع .. اليوم المنتظر ..
واقفة مخبوطة قدام المراية تحت اشراف مامتها
واختها ومرات اخوها
ها في حاجة ناقصة ؟
لا ... كله تمام

وجت الساعة 7 .. والكل قاعد يتأمل في الساعة وعقاربها
تك تك تك
الساعة بقت 8 .. 9 .. 10 .. 11 .....

ومحدش جه !

بصراحة يا مخبوطة .. مقلب محترم جداااااا
ناس ماعندهمش دم صحيح !

لا يا مخبوطة .. بلاش تظلميهم .. الظلم وحش
مش يمكن الولية جالها ضيوف فجأة ولا عيانة
ولا ماتلها ميت ..
ولا تكون خدتها من قاصرها وماتت هي بالمرة
ووفرت علينا ختم المرور بتاع ام العريس
وندخل على ختم العريس عدل بقى بعد كده
صحيح قلبك بيقولك ان في حركة ندالة اجتماعية في الموضوع
لكن برضو .. ما تدعيش عليهم الا لما تتأكدي

ماما اتصلت بصاحبة العمارة : الا صحيح .. هما الجماعة ماجوش ليه ؟
- أأ .. اصل الست ام العريس .. غيرت رأيها ..
- ليه .. هيا شافت حاجة لسة عشان ترفض ؟
- لما سألت عنكوا الجيران التانيين قالولها دول ناس هاي وهتطلب من ابنك مهر أد كده ..
- طب ما كنتي فهمتيها ان احنا مش بتوع الحاجات دي !!
- نشف ريقي وانا احاول اقنعها ان البنت واهلها طيبين ومش بتوع الكلام ده .. اترجيتها بس تجرب وتشوف بنفسها أبداً صممت ومفيش فايدة ...
- طب مش كانت تعتذر .. ده انا لففت البت على كعوب رجليها !! وشوية شوية نهد البيت ونبنيه تاني عشان سيادتها
- اتكسفت تعتذر هتقول ايه .. مش عايزة ازوركوا !
- خلاص بقى كل شيئ قسمة ونصيب ..
- ربنا يبعتلها اللي احسن منه

وبعد فترة من المقلب اللي يشرح القلب
كانت مخبوطة راجعة هي ومرات اخوها من برا
ووقفوا عند الاسانسير ..

مين الشاب اللي واقف عايز الاسانسير ده ؟؟!
توم كروز ؟؟!
ساكن معانا ده ولا ايه !!

مخبوطة لمرات اخوها بعد ما خرجوا من الاسانسير :
- مين الواد ابو عنين زرقا ده ؟
- ده العريس يختي اللي ساكن في العاشر اللي امه بوظت الموضوع قبل ما يبتدي
- هو ده !! ..... الحقوني يا ناس ! ...... الحقوني يا هوووو ... اطلبولي الاسعاف ! ....... اطلبولي المطافي ! .........أأ .. أأأأ ......... أاااااااااااااااااع


ليه ما جيتيش زرتيني وسألتيني ..
قبل ما تبوظي كل حاجة وتظلميني
فعلا ما بقاش عند الناس .. ذرة شعور او احساس
مش عارفة منين جايبين الندالة والتلامة ..
ولا احنا في اخر الزمان
وخلاص على الدنيا السلامة
وحطت مخبوطة ايدها على خدها .. بتفكر في تصرف ام العريس اللي جاتلها
ورفعت مخبوطة للسما ايديها .. داعية رب العباد يكفيها
شر امهات العرسان
اللي بتبوظلها اغلب مشاريع الخطوبة قبل ما تبتديها



استنووووووووونا.. امانة لاتروحوا.. لسا الجاية بيجلط اكترررررر...

جائني يا قراء يا كرام .. انه وفي احدى الايام
قاعدة في الاوضة البت مخبوطة
لما دخلت عليها مرات اخوها
اللي كانت منشكحة ومبسوطة





مرات اخويا : قومي البسي بسرعة ..
انا : في ايه ؟
- وحدة ست ومعاها بنتها بيسألوا عنك عايزين يخطبوا ..
- بجد ؟
- آه يلا بسرعة ...
- وايه اللي جابهم فجأة كده !!
- لا هو مش فجأة هما واخدين معاد من يومين ... بس ما حبيتش اقلقك عشان لو عملوا فينا زمبة وماجوش ما تزعليش
- انتي تعرفيهم ؟
- يعني .. مش اوي .. جيران صاحبتي .. يلا بقى يا مخبوطة ما تتأخريش !!


( وفتحت الدولاب .. تلبسي ايه يا بت يا مخبوطة تلبسي ايه )
انا : البس ده ؟
مرات اخويا : لا ده بتباني فيه تخينة ..
- ممم ... طيب ده ؟
- ايه يا مخبوطة ده قديم من السنة اللي فاتت !
- ايوة بس حلو ..
- اه حلو انما تلبسيه ليه وفي عندك اللي اجدد منه ؟!
- عشان ببان فيه رفيعة ..
- لالا .. بصي .. البسي القميص ده ..
- ده ؟؟ ده قميص نحس !! عمري ما لبسته لوظيفة واتعينت .. ولا لعريس واتنيلت على عيني اتخطبت !
- نحس ايه بس ... القميص ده بالذات فيه كل المواصفات اللازمة .. البسي البسي يلا اتأخرنا


كلام مزبوط ..
لازم وانتي خارجة تقابلي الست كونداليزارايس العرب
( ام العريس )
تكوني اجدعها عارضة ازياء
لو مليانة .. لازم تخسي ساعتها ..
ازاي معرفش
لو رفيعة اتخني .. بأي طريقة .. بأي شكل ..
لو سمرة تبيضي .. لو بيضا تسمري
قصيرة تطولي .. اقلبي كوباية وحطيها تحت كعب الجزمة
لو طويلة زيادة ...
اااااااه دي صعبة شوية
بصي شوفيلك اي طريقة تقصري بيها .. حاولي تتصرفي
اعملي بحث في جوجل عن الحكاية دي ممكن يساعدك
اعملي كل اللي تقدري عليه .. واللي ما تقدريش عليه
يا بنتي ده يوم فاصل ما بين العنوسة والزواج ..
يعني يا قاتل يا مقتول

مرات اخويا : ايه ده مش هتحطي ميك اب ؟
- منا حاطة اهو !!
- هو فين ؟
( وقربت مرات اخويا عليا ولزقت وشها في وشي .. تبحث عن بصيص الوان تضيئ بشرتي اللي صبغها المجتمع الندل باللون الاصفر .. ومسكت قلم الروج ..)
- حطي يا بنتي حطي .. ماهو انتي ما تعرفيش صاحبتي تعبت قد ايه عشان تجيبلك العريس ده ..


ودخلت مخبوطة الصالون ..
بعد ما تأكدت ان اللوك بتاعها مية مية
وألقيت على ام العريس والمحروسة بنتها نظرة سريعة
ايه المناظر دي !!
ايه يا ولية طب البسي حاجة معقولة !! .. طب اغسلي وشك !! ...يمكن غسلته وهو شكله كده ؟
تعبت نفسي على الفاضي
بقى هما دول اللي قلبت الدولاب عشانهم ؟!!


يا بت يا مخبوطة .. ما تنسيش ان موازين القوى اختلفت
زمان .. كان في قطبين جاذبين ..
معسكرين
معسكر العريس اللي بيتمنى العروسة بنت الناس المحترمين
توافق عليه ..
ومعسكر العروسة الدلوعة اللي نفسها تتجوز وتلبس الفستان الأبيض .. وتوافق من قلبها ..
مش اضطرارا ولا هربا مما هو اسوأ

انما النهاردة .. بعد انهيار معسكر اهل العروسة
وهيمنة معسكر اوحد .. وهو اهل العريس
بحكم ارتفاع عدد متأخرات الزواج وما يرافقه من ارتفاع لسقف طلبات العريس .. خصوصا بعد انتشار عمليات التجميل والشفط والنفخ ...
وهبوط سقف طلبات العروسة .. بعد ما بقى كله عواطلي وبيشرب حشـ ... أأأ .. رد بول

عشان كده بقى يا بت يا مخبوطة
انتي البسي اللي على الحبل واعملي في نفسك البدع
وكتر خيرهم بقى لو عبروكي
هما بقى يلبسوا جلابيات نايلون .. يلبسوا صفيحة نيدو قديمة ..
مش مهم
ييجوا ويقعدوا ويحطوا رجل على رجل
ويتفرجوا عليكي ويقلبوا فيكي زي البتنجانة



ام العريس : ازيك يا امورة
انا : الحمدلله يا طنط
- بسم الله ما شاء الله ربنا يحفظك
- ميرسي

اخت العريس : انتي خريجة كلية ايه ؟
انا : اقتصاد وسياسة
ام العريس : انا ابني خريج ادارة اعمال .. بس دلوقتي انتي عارفة الظروف مش لاقي وظيفة عدلة وقاعد من غير شغل ...
ماما : الظروف دي على الكل .. وابنك عنده كم سنة ؟
ام العريس : 30 .. والامورة ؟
ماما: مخبوطة 28 ..

وجحظت العيون ... وكبتت الأنفاس
وبصت ام العريس لبنتها وبنتها بصت لها وكأن الصاعقة نزلت عليهم ...


ام العريس : معقولة ؟؟؟
اخت العريس : يااااااااااااااااااااه !!!

( هي القيامة قامت ولا ايه )

ام العريس : والله افتكرتها بالكتير 22 .. مش باين عليها خالص !
ماما كشرت : والانسة بنتك عندها كم سنة ؟
- 27 ......
انا لأخت العريس : انتي متجوزة ؟
- لا
( اومال مالك يختي اتخضيتي ليه لما عرفتي عمري ! ... ما انتي متنيلة على عينك زيي !! )
ماما : يعني من سن مخبوطة !
ام العريس : يا حبيبتي هو احنا قلنا حاجة .. ان شاء الله خير بنتك بسم الله ما شاء الله مفيش احسن من كده .. ربنا يتمم على خير ..
ماما : ان شاء الله ..

وخرجت ام العريس وبنتها ..
اخر مشهد ليهم قبل خروجهم من البيت .. انهم كانوا مبتسمين
وبيقولوا ان شاء الله خير
وان البت مخبوطة .. فتاة عالية الجودة

طيب .. لعله خير

بعد يومين
دق جرس الباب ... ودخلت الست وبنتها في الصالون
وجتلي مرات اخويا تجري

مرات اخويا : دول هما يا مخبوطة .. بصي مادام رجعوا بنفسهم تاني .. يعني اكيد عايزين يتمموا الموضوع
- تفتكري ؟
- ايوة طبعا .. اصل لو مفيش نصيب هيرجعوا تاني ليه ويعملوا زيارة تانية !
- .. معاكي حق
- ما تنسيش صاحبتي من الحلاوة لما الخطوبة تتم .. هي اللي سعتلك في الحكاية دي
- مش لما يتم الاول !
- لا انا حاسة ان المرة دي مش زي كل مرة ..
( مممم .. مادام قلتي كدة .. يبقى الموضوع هيبوظ هيبوظ )

- بصي البسي وجهزي نفسك احتياطي .. لحد ما اروح اتسنط على كلامهم
- اووووكي

وراحت مرات اخويا وقفت جمب الصالون تسمع
بينما وقفت انا قدام الدولاب بحاول اتفاهم معاه
على اللبس المناسب للزيارة التانية
ولكن قطع علينا وصلة التفاهم دي مرات اخويا اللي رجعت
بعد دقايق و وشها أصفر

- مخبوطة .... خلاص .... مفيش داعي تلبسي
- ليه في ايه ؟
- الظاهر في اعتراض على السن !
- ايه !!


وراحت مخبوطة ومرات اخواها تاني
يسترقوا السمع
ويطربوا نفسهم على نغمات يعزفها مجتمع رجعي ..
وندل



ام العريس لماما : والله يا حبيبتي مش عارفة اقولك ايه .. الولد مارضيش .. قال 28 كتير اوي
ماما : ليه يعني ماهو اكبر منها !
- والله قلتله البنت كويسة تعالا معايا شوفها وبعدين قرر ابدا مارضيش .. قالي لو كانت 26 ممكن انما 28 لا !
ماما : ......
مرات اخويا : .......

( قلتلكوا من الأول ان القميص ده نحس .. محدش صدقني )







هو العريس عايز وحدة يتجوزها ؟؟ ..
ولا جزمة يشتريها ويلبسها ؟؟
26 مقاسة انما 28 يهملها

حست مخبوطة بتحقير لانسانيتها .. واهانة لمكانتها وآدميتها
فوق ماهو واد عواطلي .. عامل فيها الفيس بريسلي
يا شيخ اتلهي .. وعن وشنا انتهي
مليتو البلد ..
كل واحد بيدعي انه راجل .. وهو في الاصل ولد
هو ايه اللي ضيع فلسطين .. الا شوية الشبان المتدلعين
اللي فاكرين نفسهم شطار
وهما بالاساس خايبين

وحطت مخبوطة ايدها على خدها ... بتفكر في الاشكال اللي بتتقدملها
داعية ربها بقلب مجروح ... على كل ظالم وياخد منه الروح
ويريح الامة العربية ..
من كل الشباب اللي كان السبب
في خيبتنا الخيبة القوية


ولساااااا لاتروحوووووووووو انتظرونااااااااااااااااا

يسلمووووووووووو هالآيدين ربي

شي حلو كتير

سلمت يمناك

بالتوفيق